ចំនួនអ្នកស្លាប់ដោយសារតែជំនន់ទឹកភ្លៀងនិងព្យុះ នៅរដ្ឋ Texas របស់សហរដ្ឋ បានកើនឡើងដល់៨នាក់ គិតត្រឹមថ្ងៃអង្គារនេះ ខណៈការគំរាមកំហែងនៅតែបន្តកើតមានខ្លាំងទៀត។
សារព័ត៌មាន BBC ចុះផ្សាយបានឲ្យដឹងថា ភ្លៀងនៅតែបន្តធ្លាក់ខ្លាំង ហើយខ្យល់ព្យុះនៅតែបន្តបោកបក់ខ្លាំងនាំគ្រោះមហន្តរាយនេះ បន្តគំរាមកំហែងដល់ជីវិតមនុស្ស និងបំផ្លាញទ្រព្យសម្បត្តិជាច្រើនទៀត។
កាលពីថ្ងៃចន្ទ ប្រធានាធិបតីសហរដ្ឋអាមេរិលោក ដូណល់ ត្រាំ បានចេញសេចក្តីប្រកាសឲ្យប្រជាពលរដ្ឋដែលរស់នៅដែនដីនៅក្បែរៗនោះ ត្រូវមានការប្រុងប្រយ័ត្ន។ លោកចាត់ទុកថា នេះជាជំនន់ធំបំផុតក្នុងប្រវត្តិសាស្ត្រមិនធ្លាប់មាននោះទេ។
ភ្លៀងនិងព្យុះនោះ បានបង្កឲ្យមានការការបាក់ដី ហើយប្រជាពលរដ្ឋប្រមាណជាង ២០០០នាក់ត្រូវបានជួយសង្គ្រោះនៅទីក្រុង Houston និង បញ្ជូនទៅរកកន្លែងមានសុវត្ថិភាព ខណៈក្រុមជួយសង្គ្រោះប្រើប្រាស់ទូក និង ឧត្ថម្ភាចក្រ នៅតែបន្តអន្តរាគមន៍៕