កូរ៉េខាងជើងបាញ់មីស៊ីលរំលងប្រទេសជប៉ុននៅព្រឹក​នេះ​

កូរ៉េខាងជើង​បាញ់​មីស៊ីលរំលងប្រទេសជប៉ុននៅព្រឹកថ្ងៃអង្គារនេះ​ ដោយជោគជ័យ មិនមានការបាញ់ទម្លាក់ ដូចការធ្លាប់គំរាមរបស់ជប៉ុននោះទេ គឺមីស៊ីល​បានឆ្លងកាត់ ហើយហួសទៅធ្លាក់ និងផ្ទុះនៅក្នុងសមុទ្រ បង្កឲ្យមានការថ្កោលទោសបន្ថែមពីសហគមន៍អន្តរជាតិ។​

តាមការចុះផ្សាយរបស់សារព័ត៌មាន​ BBC បានឲ្យដឹងថា ការបាញ់រំលងប្រទេសជប៉ុននៅព្រឹកព្រលឹមថ្ងៃអង្គារនេះ មិនមានការបាញ់ទម្លាក់នោះទេ។​

ក្រោយការបាញ់រំលងប្រទេសនេះ​ហើយ នាយករដ្ឋមន្ត្រីជប៉ុន​ លោក ហ្ស៊ីនហ្សូ អាបេ បានថ្កោលទោស ហើយចាត់ទុកថា នេះជាការគំរាមកំហែងដែលមិនធ្លាប់មាន​ពេលកន្លងមក។ លោក អាបេ ចាត់ទុកថា នេះជាអំពើបង្កជម្លោះ ដោយឃោរឃៅ ដែលមិនអាចអត់ឱនឲ្យបាន ហើយថាពេលនេះរដ្ឋាភិបាលលោកកំពុងតែរៀបចំចាត់វិធានការដើម្បីការពារជីវិតរបស់ពលរដ្ឋ។​

កាលពីថ្ងៃសុក្រ និង​ថ្ងៃសៅរ៍សប្តាហ៍មុន កូរ៉េខាងជើងបានបាញ់​មីស៊ីលចំនួន​៣គ្រាប់ចូលទៅក្នុងសមុទ្រភាគខាងកើតជាប់ជាមួយជប៉ុន។​

ក្រោយការបាញ់ភ្លាមៗក្រុមប្រឹក្សាសន្តិសុខជាតិរបស់កូរ៉េខាងត្បូងបើកការប្រជុំ​លើបញ្ហានេះ រដ្ឋមន្ត្រីការបរទេសរបស់អង់គ្លេសថ្កោលទោសហើយចាត់ទុកថានោះជាការបង្កជម្លោះ មន្ទីរបង់តាហ្គោនទីបញ្ជាការដ្ឋានកងទ័ពអាមេរិក​ថ្លែងថា ការបាញ់មីស៊ីលនៅព្រឹកនេះមិនបានសំដៅទៅរកអាមេរិកទេ ហើយថា ពេលនេះក្រុមចារកម្មកំពុងតែធ្វើការងារបន្ថែមទៀតលើបញ្ហាទាំងនេះ។​

កាលពីអតីតកាលកូរ៉េខាងជើង​ធ្លាប់បាញ់មីស៊ីលរំលងប្រទេសជប៉ុនចំនួន​ពីរលើករួចមកហើយ គឺកាលពីឆ្នាំ​១៩៩៨ និង ឆ្នាំ២០០៩ ប៉ុន្តែពេលនោះកូរ៉េខាងជើង​បញ្ជាក់ថា គ្រាន់តែជាការបាញ់ផ្តាយរណបមិនមែនបាញ់អាវុធឬ មីស៊ីលនោះទេ៕