រដ្ឋមន្ត្រីក្រសួងការបរទេសថៃថ្លែងថា មិនមានការគម្រោងក្នុងការដកហូត ឬលុបចោលលិខិតឆ្លងដែនរបស់អតីតនាយករដ្ឋមន្ត្រីលោកស្រី យីងឡាក់ ដែលរត់ចេញពីប្រទេសគេចចេញពីចំណាត់ការរបស់តុលាការនោះទេ។
លោកស្រី យីងឡាក់ អាយុ៥០ឆ្នាំ បានជាប់ឆ្នោតជានាយករដ្ឋមន្ត្រី កាលពីឆ្នាំ២០១១ ហើយក៏ជាស្ត្រីទី១ដែលទទួលបានតំណែងនេះក្នុងប្រទេសថៃ ក្រោយពេលបងប្រុសរបស់លោកស្រី គឺលោក ថាក់ ស៊ីន ត្រូវបានបណ្តេញចេញពីតំណែងនាយករដ្ឋមន្ត្រី។
លោកស្រី យីងឡាក់ ត្រូវបានពួកយោធា ធ្វើរដ្ឋប្រហារទម្លាក់ចេញពីតំណែងកាលពីខែឧសភា ឆ្នាំ២០១៤ ហើយត្រូវបានតុលាការចោទប្រកាន់ពីបទធ្វើឲ្យបាត់បង់លុយរបស់ជាតិ។
លោកស្រីបានខកខាន មិនបានចូលខ្លួនទៅតុលាការកំពូលកាលពីថ្ងៃសុក្រ ខណៈអ្នកគាំទ្ររាប់ពាន់នាក់ប្រមូលផ្តុំនៅទីនោះ ហើយត្រូវបានមន្ត្រីជាន់ខ្ពស់គណបក្សរបស់លោកស្រីបញ្ជាក់ថា លោកស្រី យីងឡាក់ បានរត់ចេញទៅកាន់ទីក្រុងឌូប៉ៃ ប្រទេសអារ៉ាប់ហើយ។ ទោះយ៉ាងណាមានការអះអាងថា រដ្ឋាភិបាលយោធាថៃ ជាអ្នកបើកឲ្យលោកស្រី យីងឡាក់ រត់គេចចេញពីប្រទេសដើម្បីបន្ធូរភាពតានតឹងផ្នែកនយោបាយ។
លោកស្រី យីងឡាក់ បច្ចុប្បន្នមានលិខិតឆ្លងដែនចំនួនពីរ គឺលិខិតឆ្លងដែនធម្មតា និងលិខិតឆ្លងដែនជាអ្នកការទូត ដែលមានសិទ្ធិពិសេសលើការធ្វើដំណើរជាលក្ខណៈអន្តរជាតិ៕