មន្ត្រីជាន់ខ្ពស់របស់សហរដ្ឋអាមេរិកនិងកូរ៉េខាងត្បូង ព្រមព្រៀងគ្នាក្នុងការរៀបចំការឆ្លើយដោយការដាក់សម្ពាធមួយ ទៅលើកូរ៉េខាងជើងជុំវិញការបាញ់មីស៊ីលជាថ្មីទៀតនៅព្រឹកនេះ គឺបាញ់រំលងប្រទេសជប៉ុន។
តាមទីភ្នាក់ងារព័ត៌មានយ៉ុងហាប់របស់កូរ៉េខាងត្បូងបានបញ្ជាក់ថា ប្រធានក្រុមការងារចម្រុះនៃប្រទេសទាំងពីរបានជជែកគ្នាតាមទូរសព្ទភ្លាមៗក្រោយពេលកូរ៉េខាងជើងបាញ់មីស៊ីល ហើយបានសម្រេចដាក់សម្ពាធបន្ថែមលើកូរ៉េខាងជើង ដែលការដាក់សម្ពាធនេះ រួមទាំងផ្នែកប្រើប្រាស់យោធាផងដែរ។
យ៉ុងហាប់ឲ្យដឹងទៀតថា ពេលនេះក្រុមការងារនៃប្រទេសអាមេរិកនិងកូរ៉េខាងត្បូង កំពុងពិភាក្សាជាមួយសម្ព័ន្ធមិត្តផ្សេងៗទៀត ដើម្បីឆ្លើយតបក្នុងកម្រិតខ្លាំងមួយជាមួយកូរ៉េខាងជើង ចំពោះការបាញ់មីស៊ីលនេះដែលពួកគេហៅថា ជាការបង្កឲ្យអសន្តិសុខដែលមិនអាចអត់ឱនឲ្យបាននោះ៕
