ភ្លៀងខ្លាំងលាយឡំជាមួយខ្យល់មូសុង នៅរដ្ឋធានីប៊ុមបៃ របស់ឥណ្ឌា បានបណ្តាលឲ្យផ្លូវសំខាន់ៗលិចទឹក ការដឹកជញ្ជូនទាំងតាមផ្លូវគោក និងផ្លូវអាកាសជាច្រើនកន្លែងត្រូវបានផ្អាក ហើយជំនន់នេះ របាយការណ៍បឋមបណ្តាលឲ្យមនុស្ស៥នាក់បានស្លាប់។
តាមសារព័ត៌មាន BBC បានឲ្យដឹងថា នៅថ្ងៃពុធនេះ ភ្លៀងនៅទីក្រុងប៊ុមបៃធ្លាក់ខ្លាំង ហើយបណ្តាលឲ្យផ្លូវមួយចំនួនទឹកលិចរហូតដល់ត្រឹមចង្កេះ ចំណែកជើងហោះហើរ និងរថភ្លើងដឹកអ្នកដំណើរត្រូវបានផ្អាក ហើយមនុស្សរាប់ពាន់នាក់កំពុងតែរង់ចាំ។
ភ្លៀងនៅតែបន្តធ្លាក់ចុះខ្លាំង ប៉ុន្តែសារព័ត៌មាន BBC បានចុះផ្សាយថា ស្ថានភាពមិនទាន់អាក្រក់ខ្លាំងណាស់នោះទេនៅពេលនេះ។ ភ្លៀងនៅប៊ុមបៃនេះ គឺជាផ្នែកមួយនៃភ្លៀងជំនន់តាមប្រទេសនៅអាស៊ីភាគខាងត្បូងដែលសម្លាប់មនុស្សសរុបអស់១២០០នាក់។
ករណីជំនន់ទឹកភ្លៀងនេះ គ្រាន់តែស្ថិតនៅក្នុងរដ្ឋមួយភាគខាងជើងរបស់ឥណ្ឌាគឺ រដ្ឋ Bihar របាយការណ៍អាជ្ញាធរបញ្ជាក់ថា មានអ្នកស្លាប់ដល់៥០០នាក់។
ក្រុមអង្គការមនុស្សធម៌អន្តរជាតិដែលកំពុងជួយសង្គ្រោះបានបង្ហាញរបាយការណ៍ថា មនុស្ស១៦លាននៅក្នុងប្រទេសស្ថិតនៅអាស៊ីភាគខាងត្បូងរងផលប៉ះពាល់ពីជំនន់ទឹកភ្លៀង ហើយក្នុងនោះប្រហែល១០លាននាក់ត្រូវប្រឈមការជម្លៀសចេញពីលំនៅឋានរកទីកន្លែងមានសុវត្ថិភាព៕