មនុស្ស៧នាក់ត្រូវបានរាយការណ៍ថាស្លាប់ និងរាប់សិបនាក់ផ្សេងទៀត បានបាត់ខ្លួននៅក្នុងហេតុការណ៍បាក់អគារហិរញ្ញវត្ថុរបស់សាលារដ្ឋធានីនៅថ្ងៃនេះ ក្រោយពេលមានភ្លៀង និងបង្កជាទឹកជំនន់ខ្លាំងនៅក្នុងទីក្រុងប៊ុមបៃ ប្រទេសឥណ្ឌា។
ក្រុមអ្នកជួយសង្គ្រោះនៅបន្តរើបំណែកអគារដែលបាក់បែកនោះ ដើម្បីស្វែងរកអ្នកនៅជាប់ខាងក្នុង ហើយរកឃើញសាកសពចំនួន៧នាក់។ ហេតុការណ៍បាក់រលំនេះ កើតឡើងនៅម៉ោងប្រមាណជិត៩ព្រឹក នៅតំបន់ផ្សារ Bhendi Bazaar ជាកន្លែងដែលមានមនុស្សច្រើននៅភាគខាងត្បូងនៃទីក្រុងប៊ុមបៃ។ នេះបើតាមទីភ្នាក់ងារព័ត៌មាន AFP។
ក្រុមអ្នកជួយសង្គ្រោះបានបញ្ជាក់ឲ្យដឹងថា សាកសពចំនួន៧បានបញ្ជូនចេញក្រៅ ហើយមនុស្សប្រមាណ៣០នាក់ផ្សេងទៀត កំពុងបាត់ខ្លួននៅក្នុងអាគារនេះ។
ពលរដ្ឋឥណ្ឌាជួបគ្រោះថ្នាក់ជាបន្តបន្ទាប់ដោយសារការបាក់រលំអគារដោយសារតែសំណង់មិនសូវមានគុណភាព និងបញ្ហាគ្រោះធម្មជាតិផង។ កាលពីខែកក្កដាឆ្នាំនេះ មនុស្ស១៧នាក់បានស្លាប់ ដែលក្នុងនោះមានទាំងទារកអាយុ៣ខែផង ក្នុងហេតុការណ៍ បាក់អគារនៅជាយប៊ុមបៃ។ ចំណែកកាលពីឆ្នាំ២០១៣ មនុស្សស្លាប់៦០នាក់ ដោយសារគ្រោះមហន្តរាយបាក់អគារមួយនៅប៊ុមបៃដែរ៕
