ព្យុះ Harvey ដែលបានបោកបក់នៅភាគខាងកើតនិងខាងត្បូងនៃរដ្ឋ Texas របស់សហរដ្ឋអាមេរិកកាលពីសប្តាហ៍មុន បានបន្តបោកបក់ដល់រដ្ឋ Louisiana នាំឲ្យមនុស្សជាច្រើននាក់ត្រូវបានជម្លៀសទៅរកន្លែងមានសុវត្ថិភាព បន្ទាប់ពីព្យុះនេះធ្វើឲ្យពលរដ្ឋនៅ Texas ២៥នាក់បានស្លាប់ និង១៧នាក់បាត់ខ្លួន។
ព្យុះនិងភ្លៀងនេះ បានបណ្តាលឲ្យមនុស្ស៣២០០០ នាក់នៅក្នុងរដ្ឋ Texas ត្រូវជម្លៀសចេញទៅរកន្លែងមានសុវត្ថិភាពជាបណ្តោះអាសន្ន ហើយកាលពីថ្ងៃពុធម្សិលមិញព្យុះនេះ បានបន្តបោកបក់ដល់ទីក្រុង Lake Charles នៃរដ្ឋ Louisiana។ នេះបើតាមទីភ្នាក់ងារព័ត៌មានរ៉យទ័រ។
អាជ្ញាធរដែនដីកំពុងតែមានការព្រួយបារម្ភថា កម្លាំងខ្យល់ព្យុះ និង ជំនន់ទឹកភ្លៀងនោះ កាន់តែខ្លាំងឡើងដូច ព្យុះនិង ជំនន់នៅក្នុងទីក្រុង New Orleans កាលពីឆ្នាំ២០០៥ សម្លាប់មនុស្សអស់១៨០០នាក់ និង ព្យុះភ្លៀងកាលពីឆ្នាំ២០១២នៅ ទីក្រុង New York និង New Jersey ស្លាប់អស់១៣២នាក់៕