ក្រុមការងារជំនាញការស្រាវជ្រាវរបស់អឺរ៉ុបបានរកឃើញថា បញ្ហាសារធាតុពុលជាប្រភេទថ្នាំសម្លាប់សត្វល្អិតកើតមាននៅក្នុងស៊ុតផលិតនៅក្នុងអឺរ៉ុប ហើយប៉ះពាល់ដល់ប្រទេសចំនួន៣៤ផ្សេងទៀត គឺកើតមានឡើងតាំងពីខែកញ្ញា ឆ្នាំ២០១៦មកម្លេះ។
ពេលនេះ ស៊ុតរាប់លានគ្រាប់ត្រូវបានជញ្ជូនចេញពីហាងឬផ្សារលក់នានា ចំណែកកសិដ្ឋានចិញ្ចឹមបក្សីជាច្រើនកន្លែងទៀតត្រូវបានបិទ បន្ទាប់ពីក្រុមការងារជំនាញរបស់អឺរ៉ុបរកឃើញថា ស៊ុតមានសារធាតុថ្នាំពុលសម្លាប់សត្វល្អិត ប៉ះពាល់សុខភាពអ្នកប្រើប្រាស់។
នាយកគ្រប់គ្រងផ្នែកសុវត្ថិភាពចំណីអាហារនៃសហភាពអឺរ៉ុបបានថ្លែងថា ក្រុមការងារទើបរកឃើញសារធាតុដែលប៉ះពាល់ដល់សុខភាព ត្រូវបានប្រើប្រាស់ដោយខុសច្បាប់ក្នុងផលិតនៅក្នុងសហគមន៍អឺរ៉ុបមានការប្រើប្រាស់តាំងពីខែកញ្ញា ឆ្នាំ២០១៦។ នេះបើតាមទីភ្នាក់ងារព័ត៌មាន AFP។
ក្រុមស្រាវជ្រាវរកឃើញថា ប្រភពនៃបញ្ហាទាំងនេះ កើតចេញពីប្រទេសហូឡង់និងប៊ែលហ្សិក ដោយសារពួកគេប្រើប្រាស់សារធាតុទាំងនោះព្យាបាលសត្វមាន់មានជំងឺ ទើបនាំឲ្យមានសារធាតុពុលមាននៅក្នុងស៊ុតបន្ថែមទៀត៕