សហរដ្ឋអាមេរិកកាលពីថ្ងៃព្រហស្បតិ៍ម្សិលមិញ បានបញ្ជាឲ្យបិទស្ថានកុងស៊ុលរបស់រុស្ស៊ី នៅក្នុងទីក្រុង San Francisco នៅក្នុងរដ្ឋកាលីហ្វ័រញ៉ា ដែលការសម្រេចនេះ នាំឲ្យរុស្ស៊ីបានសម្តែងការសោកស្តាយ ស្របពេលដែលប្រទេសមហាអំណាចនុយក្លេអ៊ែទាំងពីរកំពុងតែមានការប្រឈមុខដាក់គ្នាខ្លាំង។
ប្រព័ន្ធផ្សព្វផ្សាយរបស់រដ្ឋាភិបាលអាមេរិកបានចុះផ្សាយថា ការសម្រេចនេះ គឺជាការធ្វើឲ្យស្មើភាពគ្នា បន្ទាប់ពីទីក្រុងមូស្គូ បានបណ្តេញអ្នកការទូតរបស់អាមេរិកជាង៧០០នាក់កាលពីខែកក្ដដាកន្លងទៅ។ ការដែលរុស្ស៊ីបណ្តេញអ្នកការទូតរបស់អាមេរិកនោះ បន្ទាប់ពីសភាអាមេរិកបានសម្រេចដាក់ទណ្ឌកម្មសេដ្ឋកិច្ចលើប្រទេសរុស្ស៊ីដោយចោទថា រុស្ស៊ីបានជ្រៀតជ្រែកកិច្ចការបោះឆ្នោតរបស់អាមេរិកកាលពីចុងឆ្នាំ២០១៦។ នេះបើតាមទីភ្នាក់ងារព័ត៌មាន AFP។
កាលពីខែមករាដើមឆ្នាំ២០១៧នេះ លោក ដូណល ត្រាំ ពេលឡើងកាន់តំណែងភ្លាម បានបង្ហាញក្តីសង្ឃឹមថា អាមេរិកនឹងអាចពង្រឹងទំនាក់ទំនងល្អជាមួយប្រទេសរុស្ស៊ី។
កាលពីខែកក្កដាលោក វ្លាឌីមៀ ពូទីន បានបណ្តេញមន្ត្រីធ្វើការនៅទូតអាមេរិកប្រចាំនៅរុស្ស៊ីចំនួន៧៥៥នាក់ ដែលបុគ្គលិកនោះមានទាំងជនជាតិរុស្ស៊ី និងជនជាតិអាមេរិក។ ការប្រកាសបណ្តេញបុគ្គលិកទូតអាមេរិកចេញពីរុស្ស៊ីនេះ លោក ពូទីន កំណត់ត្រឹមថ្ងៃទី១ខែកញ្ញា។
បច្ចុប្បន្នមន្ត្រីការទូតរបស់អាមេរិកធ្វើការនៅក្នុងប្រទេសរុស្ស៊ីមានចំនួន៤៥៥នាក់ ដែលចំនួននេះស្មើនឹងចំនួនអ្នកការទូតរុស្ស៊ីកំពុងធ្វើការនៅអាមេរិក។
កាលពីថ្ងៃព្រហស្បតិ៍ម្សិលមិញ អ្នកការទូតនៅវ៉ាស៊ីនតោនបានសម្តែងក្តីសង្ឃឹមថា ប្រទេសទាំងពីរ នឹងបញ្ឈប់សកម្មភាពសងសឹកគ្នាផ្នែកការទូតបន្ថែមទៀត នឹងឆ្ពោះទៅរកគោលដៅនៃការអភិវឌ្ឍរបស់ប្រទេសទាំងពីរឲ្យបានប្រសើរឡើង៕