វៀតណាមកាលពីថ្ងៃព្រហស្បតិ៍ម្សិលមិញ បានសម្តែងការព្រួយបារម្ភ និងទាមទារឲ្យចិនបញ្ឈប់ការធ្វើសមយុទ្ធយោធា លើដែនសមុទ្រជាទីតាំងដែលកំពុងមានជម្លោះ ដែលអាចបណ្តាលឲ្យមានភាពតានតឹងកាន់តែកើនឡើងខ្លាំងបន្ថែមទៀត។
បញ្ហាជម្លោះដែនសមុទ្ររវាងវៀតណាមនិងចិនកាន់តែស្មុគស្មាញឡើងបន្ថែម ខណៈចិនក៏កំពុងតែមានការប្រឈមមុខជាមួយ អាមេរិក ឥណ្ឌា និងជប៉ុនដែរនោះ។
កាលពីខែកក្កដាកន្លងទៅ ក្រោយពេលមានសម្ពាធពីចិន បានធ្វើឲ្យវៀតណាមបញ្ឈប់ការបូមយកប្រេងនៅក្នុងសមុទ្រដែលចិនអះអាងថា ជាកម្មសិទ្ធិរបស់ខ្លួន។
អ្នកនាំពាក្យក្រសួងការបរទេសវៀតណាម លោកស្រី Le Thi Thu Hang ថ្លែងថា វៀតណាមមានការព្រួយបារម្ភជាខ្លាំង ចំពោះករណីចិនធ្វើសមុទ្រយោធានៅកោះ Tonkin នៅភាគខាងជើងបំផុតនៃមហាសមុទ្រចិនខាងត្បូង។ លោកស្រីទាមទារឲ្យចិនបញ្ឈប់សកម្មភាពនេះជាបន្ទាន់។
តាមការប្រកាសរបស់រដ្ឋអំណាចទីក្រុងប៉េកាំងគឺ សមយុទ្ធនៅពេលនេះ ចិនចាប់ផ្តើមពីថ្ងៃទី២៩ខែសីហា រហូតដល់ថ្ងៃទី៤ខែកញ្ញា។ ចិនមិនទាន់មានការឆ្លើយតបយ៉ាងចំពោះការទាមទារដោយបើកចំហរបស់ភាគីវៀតណាមនេះទេ ចំណែកការធ្វើសមយុទ្ធនោះនៅតែបន្តធម្មតា៕