សហរដ្ឋអាមេរិកបានចេញច្បាប់ថ្មីហាមពលរដ្ឋរបស់ខ្លួនមិនឲ្យធ្វើដំណើរទៅកាន់ប្រទេសកូរ៉េខាងជើង ដោយមានទាំងការប្រឈមទោសព្រហ្មទណ្ឌ និង ការឈានដល់ដកហូតលិខិតឆ្លងដែន បើសិនជាអ្នកណាមិនព្រមគោរពតាមបំរាមនេះ។
ច្បាប់ថ្មីនេះ ដាក់ចេញក្រោយនិស្សិតអាមេរិកម្នាក់លោក Otto Warmbier បានស្លាប់ បន្ទាប់ពីកូរ៉េខាងជើងដោះលែងក្រោយពេលចាប់ដាក់ពន្ធនាគារមួយរយៈ ហើយអាមេរិកចោទថា កូរ៉េខាងជើងបានធ្វើទារុណកម្ម ធ្ងន់ធ្ងរលើនិស្សិតរូបនោះ។
នៅក្នុងច្បាប់ថ្មីរបស់សហរដ្ឋអាមេរិកបានបញ្ជាក់ថា ចំពោះអ្នកណាដែលមិនគោរពអាចប្រឈមនឹងការទទួលទោសព្រហ្មទណ្ឌ និង ការដកហូតលិខិតឆ្លងដែន។ នេះបើតាមសារព័ត៌មាន BBC។
សហរដ្ឋអាមេរិកបានប្រកាសអនុញ្ញាត ឲ្យពលរដ្ឋរបស់ខ្លួនដែលអាចទៅកូរ៉េខាងជើងបានគឺស្ថិតនៅក្នុងលក្ខខណ្ឌតឹងរឹងបំផុតគឺមានដូចជា អ្នកសារព័ត៌មាន និង អ្នកធ្វើការផ្នែកកិច្ចការមនុស្សធម៌។
កន្លងទៅប្រជាជនអាមេរិកប្រមាណ១០០០នាក់ បានទៅធ្វើដំណើរកំសាន្តទៅក្នុងកូរ៉េខាងជើងក្នុង១ឆ្នាំ ដែលសហរដ្ឋអាមេរិកគឺជាប្រទេសទី៥ ដែលមានពលរដ្ឋរបស់ខ្លួនធ្វើដំណើរក្នុងនាមជាអ្នកទេសចរណ៍ទៅកូរ៉េខាងជើងច្រើន។បច្ចុប្បន្នប្រជាជនអាមេរិកប្រមាណ៦០នាក់កំពុងតែរស់នៅកូរ៉េខាងជើង ក្នុងនោះមានទំនាក់ទំនងជាមួយគ្រួសារ និង ការបំពេញការងារ។ ប្រែសម្រួល ដោយពៅ មេត្តា
