ប្រធានគណបក្សសង្គ្រោះជាតិ លោក កឹម សុខា ត្រូវបានសមត្ថកិច្ចចាប់ខ្លួនភ្លាមៗទាំងកណ្ដាលអធ្រាត្រនៅគេហដ្ឋានរបស់គាត់។
បើតាមការបង្ហោះក្នុងហ្វេសប៊ុករបស់លោកផ្ទាល់ឲ្យដឹងថា លោក កឹម សុខា ត្រូវបានចាប់ខ្លួន ទាំងកណ្តាលយប់ដោយគ្មានដីកាកាលពីយប់ថ្ងៃទី០២ ចូលដល់ថ្ងៃទី០៣ ខែកញ្ញានេះ។
ក្នុងហ្វេសប៊ុករបស់លោកផ្ទាល់លើកឡើងថា៖ «លោក កឹម សុខា ត្រូវបានចាប់ខ្លួន ទាំងកណ្តាលយប់ ដោយមានក្រុម ប្រដាប់អាវុធ សម្រុកចូលគេហដ្ឋានរបស់គាត់ ដោយគ្មានដីកា។ ពេលនេះ រូបលោកត្រូវបានគេចាប់ ទៅណាក៏ពុំទាន់ដឹងឡើយ។»
បើតាមសេចក្ដីថ្លែងការណ៍របស់រដ្ឋាភិបាលចេញថ្ងៃទី៣ ខែ កញ្ញានេះ បានឲ្យដឹងថាលោក កឹម សុខា ត្រូវបានចាប់ខ្លួន ដោយមន្រ្តីនគរបាលយុត្តិធម៌ ក្នុងបទល្មើសជាក់ស្ដែង ដោយអនុលោមតាម ក្រមនីតិវិធីព្រហ្មទណ្ឌ នៃព្រះរាជាណាចក្រកម្ពុជា ។
សេចក្ដីថ្លែងការរបស់រដ្ឋាភិបាលបន្តថារដ្ឋាភិបាលសំអាងលើវីដេអូខ្លឹបមួយដែលចុះផ្សាយដោយបណ្ដាញ CBN ដែលមានទីតាំងនៅប្រទេសអូស្រ្តាលី និង ភស្ដុតាងផ្សេងទៀតដែលអាជ្ញាធររកឃើញពីផែនការសម្ងាត់នៃការឃុបឃិតគ្នារវាងលោក កឹម សុខា និង បក្សពួកជាមួយបរទេស ដែលធ្វើឲ្យប៉ះពាល់ដល់កម្ពុជា។
រដ្ឋាភិបាលបានហៅអំពើឃុបឃិតគ្នាជាសម្ងាត់នេះថាជាអំពើរក្បត់ជាតិ ដែលមានចែងនិង ផ្ដន្ទាទោសតាមបញ្ញត្តិនៃមាត្រា ៤៤៣ និងផ្នែកទីមួយស្ដីពីអំពើក្បត់ជាតិ និង អំពើចារកម្ម និងជំពូកទី ២ ស្ដីពីការប៉ះពាល់ដល់សន្តិសុខនៃរដ្ឋ។
សេចក្ដីថ្លែងការណ៍ដដែលបន្តថា បច្ចុប្បន្នលោក កឹម សុខា កំពុងស្ថិតក្រោមការឃាត់ខ្លួន និង ចាត់ការតាមច្បាប់ ដោយស្ថាប័នមានសមត្ថកិច្ច និងតុលាការ។
ជាមួយគ្នានោះដែរគណបក្សសង្គ្រោះជាតិក៏បានចេញសេចក្ដីថ្លែងការណ៍មួយដែរ ដោយ ថ្កោលទោសយ៉ាងដាច់អហង្ការចំពោះការចាប់ខ្លួនលោក កឹម សុខា។
សេចក្ដីថ្លែងការណ៍ដដែល បានហៅការចាប់ខ្លួនយ៉ាងតក់ក្រហលនេះថា ធ្វើឡើងដោយហេតុផលនយោបាយ និង ជាទង្វើរំលោភ បំពានច្បាប់ និង រដ្ឋធម្មនុញ្ញ ដោយសារ ការចាប់ខ្លួននេះធ្វើឡើងទាំងកណ្ដាលអធ្រាត្រ ក្នុងពេលដែលលោកមានអភ័យឯកសិទ្ធិសភា។
គណបក្សសង្គ្រោះជាតិបានអំពាវនាវឲ្យសមត្ថកិច្ចដោះលែងលោក កឹម សុខា ជាបន្ទាន់ និង ឥតលក្ខខណ្ឌ និង អំពាវនាវ ដល់សហគមន៍អន្តរជាតិអន្តរាគមន៍ ឲ្យមានការដោះលែង និង បញ្ឈប់ការគំរាមកំហែង គាប់សង្កត់គ្រប់រូបភាពលើគណបក្សសង្គ្រោះជាតិ និងថ្នាក់ដឹកនាំគ្រប់ជាន់ថ្នាក់។
