កូរ៉េខាងជើងបានប្រកាសនៅថ្ងៃនេះថា ខ្លួនផលិតបានគ្រាប់បែកហ៊ីដ្រូសែន ដែលផ្ទុកទៅដោយកម្លាំងបំផ្លាញដ៏មហិមា ខណៈដែលប្រធានាធិបតីអាមេរិក លោក ដូណាល់ ត្រាំ និងនាយករដ្ឋមន្ត្រីជប៉ុន លោក ហ្ស៊ិនហ្ស៊ូ អាបេ បានជជែកគ្នាតាមទូរស័ព្ទអំពីវិបត្តិនុយក្លេអ៊ែរចេះតែកើនឡើង។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters ដោយផ្អែកទៅតាមសេចក្ដីរាយការណ៍មួយរបស់ទីភ្នាក់ងារព័ត៌មានរដ្ឋកូរ៉េខាងជើង KCNA។
Reuters បានផ្សាយថា កូរ៉េខាងជើងបានប្រកាសបែបនេះ ចំពេលដែលភាពតានតឹងនៅក្នុងតំបន់កាន់តែកើនឡើងខ្ពស់ ក្រោយពីក្រុងព្យុងយ៉ាងបាញ់សាកល្បងគ្រាប់មីស៊ីលអន្តរទ្វីប ២លើក កាលពីខែកក្កដាកន្លងមកនេះ។ គ្រាប់មីស៊ីលនោះ ត្រូវបានគេវាយតម្លៃថា អាចនឹងរត់បានចម្ងាយ ១ម៉ឺនគីឡូម៉ែត្រ។ ជាមួយសត្ថភាពបែបនេះ គ្រាប់មីស៊ីលនោះ ត្រូវបានគេប៉ាន់ស្មានថា អាចនឹងវាយប្រហារដល់ផ្នែកជាច្រើននៃទឹកដីអាមេរិក។
ទីភ្នាក់ងារព័ត៌មាន KCNA បាននិយាយថា កូរ៉េខាងជើងថ្មីៗនេះ បានទទួលជោគជ័យក្នុងការផលិតនូវគ្រាប់បែកហ៊ីដ្រូសែនកាន់តែខ្លាំងក្លាបន្ថែមទៀត៕
