ប្រធានាធិបតីឥណ្ឌូនេស៊ី លោក ចូកូ វីដូដូ បាននិយាយនៅថ្ងៃនេះថា លោកចង់ឲ្យវិបត្តិមនុស្សធម៌ពាក់ព័ន្ធនឹងជនជាតិរ៉ូហ៊ីងយ៉ានៅក្នុងប្រទេសភូមា ត្រូវបានដោះស្រាយប្រកបដោយទស្សនវិស័យ មិនមែនគ្រាន់តែធ្វើសេចក្ដីថ្លែងការណ៍ថ្កោលទោសជាសាធារណៈនោះទេ។ នេះដោយយោងតាមការចុះផ្សាយរបស់សារព័ត៌មាន Channel News Asia។
សារព័ត៌មានបានចុះផ្សាយថា លោក ចូកូ បានប្ដេជ្ញាជួយដល់ជនជាតិរ៉ូហ៊ីងយ៉ា និងបានបញ្ជូនរដ្ឋមន្ត្រីការបរទេស អ្នកស្រី រ៉េតណូ ម៉ាស៊ូឌី ទៅជួបជជែកអំពីបញ្ហានេះជាមួយមេដឹកនាំភូមា។
អ្នកស្រី រ៉េតណូ គ្រោងនឹងជួបជាមួយប្រធានក្រុមប្រឹក្សារដ្ឋភូមា អ្នកស្រី អ៊ុងសាន ស៊ូជី នៅថ្ងៃនេះ។
លោក ចូកូ បានលើកឡើងថា រូបលោក និងពលរដ្ឋឥណ្ឌូនេស៊ី សោកស្ដាយចំពោះអំពើហិង្សាដែលបានកើតឡើងនៅរដ្ឋរ៉ាក់ឃីន ក្នុងប្រទេសភូមា។ លោកបន្តថា មានតម្រូវការសកម្មភាព មិនមែនគ្រាន់តែចេញសេចក្ដីថ្លែងការណ៍ថ្កោលទោសនោះទេ។
ប្រធានាធិបតីឥណ្ឌូនេស៊ីរូបនេះ បាននិយាយថា អំពើហិង្សាប្រឆាំងនឹងជនជាតិភាគតិចរ៉ូហ៊ីងយ៉ា គួរតែបញ្ចប់ឲ្យបានឆាប់ ហើយគួរតែមានការជ្រោមជ្រែងពីសហគមន៍អន្តរជាតិទៅដល់ពួកគេ៕