សារព័ត៌មានអង់គ្លេស បានចុះផ្សាយថា កូរ៉េខាងជើងបានត្រៀមខ្លួនបាញ់គ្រាប់មីស៊ីលជាថ្មីទៀតហើយ ដែលទំនងជាគ្រាប់មីស៊ីលអន្តរទ្វីប បន្ទាប់ពីរដ្ឋឯកោមួយនេះ បានបំផ្ទុះគ្រាប់បែកនុយក្លេអ៊ែរសាកល្បងកាលពីថ្ងៃម្សិលមិញនេះ។
សារព័ត៌មានមេត្រូរបស់អង់គ្លេស បានចុះផ្សាយបែបនេះនៅថ្ងៃនេះ ដោយបានដកស្រង់សម្ដីពីយោធារបស់កូរ៉េខាងត្បូង។
រដ្ឋមន្ត្រីការពារជាតិកូរ៉េខាងត្បូង លោក ឆាង ឃ្យុងសូ បាននិយាយថា កូរ៉េខាងជើងហាក់បង្ហាញភាពត្រៀមខ្លួនបាញ់គ្រាប់មីស៊ីល ដែលប្រហែលជាគ្រាប់មីស៊ីលឆ្លងទ្វីប។
ប្រមុខការពារជាតិកូរ៉េខាងត្បូងរូបនេះ បានឲ្យដឹងថា យោធាកំពុងបន្តតាមដានសញ្ញានៃការបាញ់គ្រាប់មីស៊ីលបន្ថែមទៀត ហើយយោធាប៉ាន់ស្មានថា កូរ៉េខាងជើងអាចបាញ់គ្រាប់មីស៊ីលឆ្លងទ្វីប។
កាលពីថ្ងៃម្សិលមិញនេះ កូរ៉េខាងជើងបានប្រកាសថា ខ្លួនទទួលបានជោគជ័យក្នុងការសាកល្បងគ្រាប់បែកអ៊ីដ្រូសែន ដែលការសាកល្បងនេះ ជំរុញឲ្យអាមេរិកព្រមានអំពីការប្រើប្រាស់កម្លាំងយោធាប្រឆាំងនឹងក្រុងព្យុងយ៉ាង៕
