ប្រធានាធិបតីចិន លោក ស៊ី ជិនពីង និងប្រធានាធិបតីរុស្ស៊ី លោក វ៉្លាឌីមៀ ពូទីន បានឯកភាពគ្នាកាលពីថ្ងៃម្សិលមិញថា នឹងដោះស្រាយក្នុងលក្ខណៈត្រឹមត្រូវចំពោះបញ្ហាការសាកល្បងគ្រាប់បែកនុយក្លេអ៊ែរថ្មីបំផុតពីសំណាក់កូរ៉េខាងជើង។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
Reuters បានចុះផ្សាយបែបនេះ ដោយផ្អែកទៅតាមទីភ្នាក់ងារព័ត៌មានស៊ិនហួររបស់ចិន ដែលបានចេញផ្សាយនៅថ្ងៃនេះ។
ស៊ិនហួរបានផ្សាយថា មេដឹកនាំប្រទេសទាំងពីរបានយល់ព្រមអនុវត្តទៅតាមគោលដៅរំសាយអាវុធនុយក្លេអ៊ែរនៅលើឧបទ្វីបកូរ៉េ និងរក្សាទំនាក់ទំនង និងការសម្របសម្រួលដោយជិតដិត ដើម្បីដោះស្រាយស្ថានការណ៍ថ្មីៗនេះ។
មេដឹកនាំមហាអំណាចទាំងពីរនេះ បានឯកភាពគ្នាបែបនេះ អំឡុងជំនួបរបស់ពួកគេនៅក្រៅកិច្ចប្រជុំកំពូលក្រុមប្រទេស BRICS នៅទីក្រុងសៀមេន ភាគអាគ្នេយ៍ប្រទេសចិន៕
