មេដឹកនាំភូមា អ្នកស្រី អ៊ុងសាន ស៊ូជី បានរងសម្ពាធពីបណ្ដាប្រទេសមូស្លីមនានា ឲ្យបញ្ឈប់អំពើហិង្សាប្រឆាំងនឹងជនជាតិមូស្លីមរ៉ូហ៊ីងយ៉ា បន្ទាប់ពីជនជាតិរ៉ូហ៊ីងយ៉ាជិត ១២ម៉ឺន ៥ពាន់នាក់ បានរត់ភៀសខ្លួនចូលទៅក្នុងប្រទេសបង់ក្លាដែស។ នេះដោយយោងតាមការចុះផ្សាយទីភ្នាក់ងារព័ត៌មាន Reuters។
Reuters បានផ្សាយបន្តថា ប្រទេសឥណ្ឌូនេស៊ី បង់ក្លាដែស និងប៉ាគីស្ថាន សុទ្ធតែបានដាក់សម្ពាធលើប្រទេសភូមា ជាពិសេសជយលាភីពានរង្វាន់ណូបែលសន្តិភាព អ្នកស្រី ស៊ូជី។
បើតាម Reuters រដ្ឋមន្ត្រីការបរទេសឥណ្ឌូនេស៊ី អ្នកស្រី រ៉េតណូ ម៉ាស៊ូឌី បានជួបជាមួយអ្នកស្រី ស៊ូជី និងប្រមុខកងទ័ពភូមា លោក មីន អ៊ុងលាំង កាលពីថ្ងៃចន្ទម្សិលមិញនេះ ដើម្បីស្នើឲ្យបញ្ឈប់ការបង្ហូរឈាមនេះ។ ក្រៅពីនេះ អ្នកស្រី រ៉េតណូ ក៏គ្រោងហោះហើរទៅកាន់ទីក្រុងដាកា ជួបជាមួយមេដឹកនាំដទៃទៀតផងដែរ ដើម្បីជជែកអំពីបញ្ហានេះ។
ក្រោយជំនួបជាមួយអ្នកស្រី ស៊ូជី នៅទីក្រុងណៃពិដោរ កាលពីថ្ងៃម្សិលមិញនេះ អ្នកស្រី រ៉េតណូ បានថ្លែងថា អាជ្ញាធរសន្តិសុខ ចាំបាច់ត្រូវតែបញ្ឈប់ជាបន្ទាន់នូវទម្រង់អំពើហិង្សាទាំងអស់ ព្រមទាំងផ្ដល់ជំនួយមនុស្សធម៌ និងជំនួយអភិវឌ្ឍន៍សម្រាប់រយៈពេលខ្លី និងរយៈពេលវែង។
អំពើហិង្សាថ្មីបំផុតនៅក្នុងរដ្ឋរ៉ាក់ឃីន ស្ថិតនៅភាគពាយព្យប្រទេសភូមា បានចាប់ផ្ដើមកាលពីថ្ងៃទី២៥ ខែសីហា នៅពេលពួកបះបោររ៉ូហ៊ីងយ៉ា វាយប្រហារលើប៉ុស្តិ៍ប៉ូលិសភូមាជាច្រើនកន្លែង និងមូលដ្ឋានយោធាមួយកន្លែង។ វាយបកវិញពីពួកយោធាភូមា បានសម្លាប់មនុស្សយ៉ាងតិច ៤០០នាក់ និងបង្ខំឲ្យអ្នកភូមិរាប់ពាន់នាក់រត់ភៀសខ្លួនចូលទៅក្នុងប្រទេសបង់ក្លាដែស៕
អំពើហិង្សាទៅលើជនជាតិរ៉ូហ៊ីងយ៉ាងប្រហែល ១លាន ១សែននាក់ គឺជាបញ្ហាប្រឈមចម្បងសម្រាប់អ្នកស្រី ស៊ូជី ដែលរងការរិះគន់ថា មិននិយាយអ្វីទាល់តែសោះចំពោះការបញ្ហារំលោភសិទ្ធិមនុស្សនេះ៕
