ប្រធានាធិបតីអាមេរិក លោក ដូណាល់ ត្រាំ បានប្រាប់សមភាគីកូរ៉េខាងត្បូងនៅថ្ងៃនេះថា ក្រុងវ៉ាស៊ីងតោនមានឆន្ទៈឯកភាពលើការលក់សព្វាវុធមានតម្លៃជាច្រើនពាន់លានដុល្លារ ទៅឲ្យក្រុងសេអ៊ូល។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
មេដឹកនាំអាមេរិកបានប្រកាសឲ្យដឹងបែបនេះ ក្រោយពីក្រុងព្យុងយ៉ាងបានធ្វើតេស្តសាកល្បងគ្រាប់បែកនុយក្លេអ៊ែរជាថ្មីម្ដងទៀតកាលពីថ្ងៃអាទិត្យកន្លងមកនេះ ដែលគ្រាប់បែកនោះ ត្រូវបានគេជឿថា ជាគ្រាប់បែកអ៊ីដ្រូសែន។
AFP បានចុះផ្សាយសម្រង់សម្ដីមេដឹកនាំអាមេរិកបែបនេះ ដោយផ្អែកតាមព័ត៌មានរបស់សេតវិមានអាមេរិក។ សេតវិមានអាមេរិកបានឲ្យដឹងថា លោក ត្រាំ បានផ្ដល់ការឯកភាពជាគោលការណ៍រួចហើយសម្រាប់ការលក់សព្វាវុធ និងសម្ភារៈសឹកមានតម្លៃជាច្រើនពាន់លានដុល្លារទៅឲ្យកូរ៉េខាងត្បូង។ ប៉ុន្តែ សេតវិមានអាមេរិកពុំបានផ្ដល់ព័ត៌មានលម្អិតអំពីកិច្ចព្រមព្រៀងនោះទេ។
យោងទៅតាមការវិភាគមួយពីវិទ្យាស្ថានស្រាវជ្រាវសន្តិភាពអន្តរជាតិស្តុកខម បានឲ្យដឹងថា អាមេរិកបានលក់សព្វាវុធតម្លៃជិត ៥ពាន់លានដុល្លារទៅឲ្យកូរ៉េខាងត្បូងនៅចន្លោះឆ្នាំ២០១០ ដល់ឆ្នាំ២០១៦។
កូរ៉េខាងត្បូងគឺជាប្រទេសទិញសព្វាវុធពីអាមេរិកធំលំដាប់ទី៤នៅក្នុងរយៈពេលនោះ បន្ទាប់ពីអារ៉ាប៊ីសាអ៊ូឌីត អូស្ត្រាលី និងអារ៉ាប់រួម៕
