ប្រធានាធិបតីរុស្ស៊ីលោក វ្លាឌីមៀ ពូទីន បានព្រមានពីការភ័យខ្លាចរាលដាលនៃគ្រោះមហន្តរាយដោយសារកម្មវិធីអាវុធនុយក្លេអ៊ែរបស់កូរ៉េខាងជើង ដែលអាចឈានដល់ការសម្លាប់មនុស្សជាទ្រង់ទ្រាយធំកើតឡើងជាថ្មីដូចពីអតីតកាលទៀត។
ថ្លែងក្នុងពេលបំពេញទស្សនកិច្ចនៅក្នុងប្រទេសចិនកាលពីម្សិលមិញ លោក ពូទីន ថ្លែងថា ត្រូវប្រុងប្រយ័ត្នក្នុងការប្រើប្រាស់កម្លាំងយោធាជាមួយកូរ៉េខាងជើង ហើយលោកបញ្ជាក់ថា ជម្រើសល្អតែមួយគត់ក្នុងការដោះស្រាយបញ្ហានេះ គឺការដោះស្រាយវិធានការតាមបែបការទូតដោយសារចរចា និងមិនមានការដាក់ទណ្ឌកម្ម។ លោក ពូទីន ថ្លែងទៀតថា ការដាក់ទណ្ឌរបស់ប្រទេសនានានោះមិនមានប្រសិទ្ធភាពក្នុងការដោះស្រាយបញ្ហាកម្មវិធីអាវុធនុយក្លេអ៊ែជាមួយកូរ៉េខាងជើងនោះទេ។ នេះបើតាមសារព័ត៌មាន CNN។
លោក ពូទីន ថ្លែងថា របបកូរ៉េខាងជើងអាចរស់បានដោយសារតែដោយសារតែកម្មវិធីអាវុធនុយក្លេអ៊ែ ហើយថា បើសិនជាលោកខាងលិចអន្តរាគមន៍ទម្លាក់រដ្ឋាភិបាលនេះ នឹងនាំមកលទ្ធផលដូចការទម្លាក់រដ្ឋាភិបាលអ៊ីរ៉ាក់ដឹកនាំដោយលោក សាដាំ ហូសេន ដែលកំពុងបំផ្លាញដោយសារតែសង្គ្រាម។
កាលពីថ្ងៃចន្ទដើមសប្តាហ៍នេះ ទូតអាមេរិកប្រចាំនៅអង្គការសហប្រជាជាតិលោកស្រី Nikki Haley បានថ្លែងថា លោក គីម ជុងអ៊ុន កំពុងតែចាប់ផ្តើមបង្កសង្គ្រាម ហើយបានជំរុញឲ្យក្រុមប្រឹក្សាសន្តិសុខអង្គការសហប្រជាជាតិសម្រេចដាក់ចេញទណ្ឌធ្ងន់ធ្ងរដើម្បីបញ្ឈប់សកម្មភាពរបស់កូរ៉េខាងជើង៕
