រដ្ឋាភិបាលថៃបានព្រមព្រៀងចុះហត្ថលេខាលើកិច្ចសន្យាចំនួនពីរ លើទឹកប្រាក់ប្រមាណ៥,២ពាន់លានបាត ជួយក្រុមហ៊ុនរដ្ឋចិន ក្នុងការកសាងផ្លូវដែនល្បឿនលឿនចំនួន២ខ្សែ ជាគម្រោងរបស់រដ្ឋាភិបាលចិន «ផ្លូវមួយខ្សែក្រវ៉ាត់មួយ»។
រដ្ឋាភិបាលថៃ និងសហគ្រាសរបស់រដ្ឋាភិបាលចិន បានចុះហត្ថលេខាលើកិច្ចសន្យានៅក្នុងសប្តាហ៍នេះ ដែលមានសាក្សីប្រធានាធិបតីចិនលោក ស៊ី ជីនពីង និងនាយករដ្ឋមន្ត្រីថៃលោក ប្រាយុទ្ធ ចាន់អូចា នៅក្នុងកិច្ចប្រជុំកំពូល BRICS នៅក្នុងប្រទេសចិន។ នេះបើតាមទីភ្នាក់ងារព័ត៌មានរ៉យទ័រ។
គម្រោងកសាងផ្លូវដែកទាំងពីរគ្រោងធ្វើក្នុងចម្ងាយផ្លូវប្រមាណ ៨៧៣គីឡូម៉ែត្រ ដែលមួយភ្ជាប់ពីប្រទេសថៃទៅកាន់ប្រទេសឡាវ និងមួយទៀតភ្ជាប់ពីទីក្រុងបាងកកប្រទេសថៃទៅកាន់ខេត្ត ណា ខន នៅភាគខាងជើងនៃប្រទេស។
គម្រោងរបស់រដ្ឋាភិបាលនៃប្រទេសទាំងពីរចាប់ផ្តើមធ្វើឡើងតាំងពីឆ្នាំ២០១៤ ប៉ុន្តែត្រូវបានពន្យារពេលមួយរយៈហើយ ក៏ចាប់ផ្តើមឡើងវិញនេះ ក្រោយពេលភាគីទាំងពីរបានពិភាក្សាគ្នា ដោយពិនិត្យលើទឹកប្រាក់ដែលកំពុងមាន និងកម្ចីដែលអាចដំណើរការទៅបាន៕