អន្តរជាតិ

UN ប៉ាន់ប្រមាណថា ជនភៀសខ្លួនរ៉ូហ៊ីងយ៉ារត់ទៅបង់ក្លាដែសនឹងកើនដល់៣សែននាក់

លោក ឌិត សុខធី
| ០៧ កញ្ញា ២០១៧
ម៉ោង ១១:៣៨

មន្ត្រីទីភ្នាក់ងារអង្គការសហប្រជាជាតិម្នាក់ បាននិយាយនៅថ្ងៃនេះ ជនមូស្លីមរ៉ូហ៊ីងយ៉ារហូតដល់ ៣សែននាក់ អាចនឹងរត់ភៀសខ្លួនចេញពីអំពើហិង្សានៅភាគពាយព្យប្រទេសភូមា ចូលទៅក្នុងប្រទេសបង់ក្លាដែស។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។

Reuters បានចុះផ្សាយបន្តថា នេះគឺជាសញ្ញាព្រមានអំពីកង្វះខាតជំនួយស្បៀងអាហារសង្គ្រោះបន្ទាន់ សម្រាប់ជនភៀសខ្លួនដែលមានចំនួនកាន់តែកើនឡើងនោះ។

យោងតាមការប៉ាន់ប្រមាណមួយពីបុគ្គលិកអង្គការសហប្រជាជាតិនៅតំបន់ព្រំដែនប្រទេសបង់ក្លាដែស បានឲ្យដឹងថា ចំនួនជនភៀសខ្លួនរ៉ូហ៊ីងយ៉ាដែលបានរត់ទៅដល់ព្រំដែនបង់ក្លាដែសចាប់តាំងពីការផ្ទុះអំពើហិង្សាជាថ្មីម្ដងទៀតកាលពី១២ថ្ងៃមុននោះ បានកើនឡើងដល់ចំនួន ១៤ម៉ឺន ៦ពាន់នាក់ហើយ។

គេពិបាកប៉ាន់ស្មានពីចំនួនជាក់លាក់នៃជនភៀសខ្លួនរ៉ូហ៊ីងយ៉ា ដោយសារតែចលាចល ខណៈដែលជនជាតិរ៉ូហ៊ីងយ៉ាបានរត់ភៀសខ្លួនចេញពីប្រតិបត្តិការរបស់យោធាភូមា។

ទោះជាយ៉ាងណា ក្រុមមន្ត្រីអង្គការសហប្រជាជាតិ បានដំឡើងការប៉ាន់ប្រមាណរបស់ពួកគេអំពីចំនួនជនភៀសខ្លួនពីចំនួន ១២ម៉ឺននាក់ ទៅដល់ ៣០ម៉ឺននាក់។ នេះដោយយោងតាមអ្នកនាំពាក្យនៃកម្មវិធីស្បៀងអាហារពិភពលោករបស់អង្គការសហប្រជាជាតិប្រចាំនៅប្រទេសបង់ក្លាដែស៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។