ក្រុមប្រឹក្សាសន្តិសុខអង្គការសហប្រជាជាតិ នៅថ្ងៃនេះ បានថ្កោលទោសកូរ៉េខាងជើងដែលបានបាញ់គ្រាប់មីស៊ីលរំលងប្រទេសជប៉ុន ដោយចាត់ទុកជា«ទង្វើបង្កហេតុកម្រិតខ្ពស់» ខណៈដែលប្រធានាធិបតីអាមេរិក លោក ដូណាល់ ត្រាំ បានកំណត់ពេលជួបជជែកជាមួយមេដឹកនាំជប៉ុន និងកូរ៉េខាងត្បូង ដើម្បីដោះស្រាយវិបត្តិនេះ។ នេះដោយយោងតាមសេចក្ដីរាយការណ៍របស់ទីភ្នាក់ងារព័ត៌មាន AFP។
កូរ៉េខាងជើងបានបាញ់គ្រាប់មីស៊ីលឆ្លងទ្វីបរំលងប្រទេសជប៉ុនកាលពីថ្ងៃម្សិលមិញនេះ ដោយបានធ្លាក់នៅមហាសមុទ្រប៉ាស៊ីហ្វិក ដែលនោះគឺជាទង្វើរបស់ក្រុងព្យុងយ៉ាងឆ្លើយតបទៅនឹងទណ្ឌកម្មថ្មីពីសំណាក់អង្គការសហប្រជាជាតិ បន្ទាប់ពីការធ្វើតេស្តសាកល្បងគ្រាប់បែកនុយក្លេអ៊ែរថាមពលខ្លាំងក្លាលើកទី៦ កាលពីថ្ងៃទី០៣ ខែកញ្ញាកន្លងមកនេះ។
ក្នុងសេចក្ដីថ្លែងការណ៍ជាឯកឆន្ទគាំទ្រដោយប្រទេសចិនផងនោះ ក្រុមប្រឹក្សាសន្តិសុខអង្គការសហប្រជាជាតិ បានលើកឡើងថា ការបាញ់គ្រាប់មីស៊ីលនោះ ត្រូវបានធ្វើឡើងតែ ៣សប្ដាហ៍ប៉ុណ្ណោះ ក្រោយពីក្រុងព្យុងយ៉ាងបាញ់គ្រាប់មីស៊ីលដំបូងរំលងប្រទេសជប៉ុន។
ក្រុមប្រឹក្សានេះ បានថ្កោលទោស«ខ្លាំងក្លា»ទៅលើការបាញ់គ្រាប់មីស៊ីលទាំងនេះ ដោយថ្កោលទោសបន្ថែមទៀតទៅលើសកម្មភាពគឃ្លើនរបស់រដ្ឋឯកោមួយនេះ ហើយបានទាមទារទៅក្រុងព្យុងយ៉ាង ឲ្យបញ្ឈប់ជាបន្ទាន់នូវសកម្មភាពបែបនេះទាំងអស់។
នៅឯរដ្ឋធានីវ៉ាស៊ីងតោនឯណោះវិញ សេតវិមានបានប្រកាសថា លោក ត្រាំ នឹងជួបជាមួយនាយករដ្ឋមន្ត្រីជប៉ុន លោក ស៊ិនហ្សូ អាបេ និងប្រធានាធិបតីកូរ៉េខាងត្បូង លោក មូន ជែអ៊ីន នៅទីក្រុងញូវយ៉ក នៅថ្ងៃព្រហស្បតិ៍សប្ដាហ៍ក្រោយ។
បញ្ហាកូរ៉េខាងជើង នឹងគ្របដណ្ដប់លើរបៀបវារៈនៃកិច្ចប្រជុំមហាសន្និបាតអង្គការសហប្រជាជាតិរបស់មេដឹកនាំពិភពលោក នៅសប្ដាហ៍ក្រោយនេះ៕
