អង្គការលើកលែងទោសអន្តរជាតិ បានបញ្ចេញរូបភាពផ្កាយរណបថ្មីៗស្ដីពីការដុតបំផ្លាញភូមិឋាននានានៅក្នុងរដ្ឋរ៉ាក់ឃីន ដោយចោទថា កងកម្លាំងសន្តិសុខភូមា បានដឹកនាំការបោសសម្អាត «ជាប្រព័ន្ធ»លើក្រុមជនជាតិភាគតិចមូស្លីមរ៉ូហ៊ីងយ៉ានៅក្នុងរយៈពេលជាង ៣សប្ដាហ៍កន្លងមកនេះ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
Reuters បានដកស្រង់សម្ដីអង្គការសិទ្ធិមនុស្សអន្តរជាតិមួយនេះ ដែលបាននិយាយកាលពីថ្ងៃសុក្រសប្ដាហ៍មុនថា យ៉ាងហោចណាស់ភូមិឋាន ២៦កន្លែង ត្រូវបានភ្លើងឆាបឆេះនៅតំបន់សម្បូរទៅដោយជនជាតិរ៉ូហ៊ីងយ៉ា។ អង្គការនេះបានបង្ហាញរូបថតពណ៌ប្រផេះ ដែលគូសបញ្ជាក់ថា ផ្ទះសម្បែងត្រូវបានដុតបំផ្លាញ។
ដោយផ្អែកលើរូបថតទាំងនោះ អង្គការនេះបាននិយាយថា រូបថតអណ្ដាតភ្លើងដែលចាប់បានតាមរយៈផ្កាយរណបនោះ បានឆាបឆេះក្នុងទ្រង់ទ្រាយធំ នៅទូទាំងភាគខាងជើងរដ្ឋរ៉ាក់ឃីន ចាប់តាំងពីថ្ងៃទី២៥ ខែសីហាមកម៉្លេះ ពោលគឺនៅពេលដែលកងទ័ពភូមាចាប់ផ្ដើមប្រតិបត្តិការបោសសម្អាត។
អំពើហិង្សាថ្មីបំផុតបានផ្ទុះឡើងកាលពីថ្ងៃទី២៥ ខែសីហា នៅក្នុងរដ្ឋរ៉ាក់ឃីន បន្ទាប់ពីការវាយប្រហារពីសំណាក់ពួកបះបោររ៉ូហ៊ីងយ៉ា ទៅលើប៉ុស្តិ៍ប៉ូលិស និងជំរុំយោធាភូមា ដែលជំរុញឲ្យមានការវាយប្រហារសងសឹកពីសំណាក់កម្លាំងសន្តិសុខភូមា។
អង្គការសហប្រជាជាតិ បានឲ្យដឹងថា យ៉ាងហោចណាស់ជនជាតិរ៉ូហ៊ីងយ៉ា ៤៣ម៉ឺននាក់ បានរត់ភៀសខ្លួនចូលទៅក្នុងប្រទេសបង់ក្លាដែស ដើម្បីគេចពីការបោសសម្អាតជាតិសាសន៍នេះ៕
