តុលាការកំពូលរបស់ថៃ ប្រកាសសេចក្តីសម្រេចនៅថ្ងៃនេះ ឲ្យលោកស្រី យីង ឡាក់ នាយករដ្ឋមន្ត្រីដែលត្រូវបានបណ្តេញចេញពីតំណែង ឲ្យជាប់ពន្ធនាគារចំនួន៥ឆ្នាំ ពាក់ព័ន្ធ និងកំហុសធ្វេសប្រហែលបណ្តាលឲ្យបាត់បង់លុយជាតិលើគម្រោងទិញស្រូវ។
ការប្រកាសសាលដីកា សម្រេចទោសលើលោកស្រី យីង ឡាក់នៅរសៀលនេះ មិនមានវត្តមានលោកស្រីទេ គឺ មានតែអ្នកគាំទ្រប្រមូលផ្តុំនៅមុខតុលាការក្នុងទីក្រុងបាងកក។ មេធាវីការពារក្តីឲ្យលោកស្រី យីង ឡាក់ ថ្លែងថា ពួកគេមិនបានទាក់ទងកូន ក្តីរបស់ខ្លួនតាំងពីខែសីហា មក ហើយមិនដឹងថា កូនក្តីនៅទីណានោះទេ។ នេះបើតាមសារព័ត៌មានChannel News Asia។
រដ្ឋាភិបាលយោធាថៃ អះអាងថា លោកស្រី យីង ឡាក់ បានរត់គេចចេញពីប្រទេស ហើយត្រៀមបន្តគេចចេញទៅប្រទេសទី៣ ទៀត។
លោកស្រី យីង ឡាក់ អាយុ ៥០ឆ្នាំ ត្រូវបានប្រព័ន្ធផ្សព្វផ្សាយនានា ចុះផ្សាយថា លោកស្រី បានរត់គេចចេញពីប្រទេស កាលពីចុងខែសីហា ទៅរស់នៅជាមួយបងប្រុសរបស់លោកស្រី គឺលោក ថាក់ ស៊ីន នៅក្នុងទីក្រុងឌូប៉ៃនៃប្រទេសអារ៉ាប់។
លោកស្រី យីង ឡាក់ជាប់ឆ្នោតជា នាយករដ្ឋមន្ត្រីកាលពីឆ្នាំ២០១១ គឺមានប្រជាប្រិយភាពខ្លាំងលើគោលនយោបាយទិញស្រូវពីកសិករក្នុងតម្លៃសមរម្យ ប៉ុន្តែពួករដ្ឋាភិបាលយោធា ដែលធ្វើរដ្ឋប្រហារទម្លាក់លោកស្រីកាលពីឆ្នាំ២០១៤ បានចោទថា តាមគម្រោងទិញស្រូវនេះ ធ្វើឲ្យបាត់បង់ថវិកាជាតិ ប្រមាណ៨ ពាន់លានដុល្លារអាមេរិក។
ជុំវិញករណីលោកស្រី យីង ឡាក់នេះ ត្រូវបានក្រុមអ្នកវិភាគមួយចំនួនអះអាងថា ជាចេតនារបស់ក្រុមយោធា និង រាជវាំងថៃ ជាអ្នករៀបចំដាក់បន្ទុក ក្នុងបំណងលុបបំបាត់ខ្សែស្រឡាយលោកថាក់ ស៊ីន ដោយសារក្រុមនេះ មានប្រជាប្រិយភាពជាងក្សត្រ។ ចំណែកការគេចខ្លួនរបស់លោកស្រី យីង ឡាក់នេះ គឺជាចេតនារបស់ពួកយោធា ដែលចង់ឲ្យលោកស្រី ចាកចេញពីប្រទេសជៀសវាងការចាប់ខ្លួន ដើម្បីកុំឲ្យមានភាពតានតឹងផ្នែកនយោបាយ។