អ្នកដំណើររត់ជាន់គ្នានៅស្ថានីយ៍រថភ្លើងក្នុងទីក្រុងម៉ុមបៃនៃប្រទេសឥណ្ឌានៅព្រឹកថ្ងៃសុក្រនេះ បណ្តាលឲ្យស្លាប់២២នាក់ និង ៣០នាក់ផ្សេងទៀតរងរបួស ហេតុការណ៍កើតឡើងនៅពេលដែលមានភ្លៀងខ្លាំង ហើយរថភ្លើងក៏បើកមកដល់។
ហេតុការណ៍នេះ កើតឡើងនៅស្ថានីយ៍រថភ្លើងឈ្មោះ Elphinstone ដែលភ្ជាប់ទៅទីក្រុងចំនួន២សំខាន់។ ហេតុការណ៍ជាន់គ្នាកើតឡើងនៅកន្លែងមនុស្សច្រើន ស្ថិតនៅលើស្ពានថ្មើរជើងឆ្ពោះទៅកាន់ស្ថានីយ៍រថភ្លើងក្បែរនោះ។ នេះបើតាមសារព័ត៌មានBBC។
ក្រុមអ្នកជួយសង្គ្រោះបង្ហាញរបាយការណ៍ថា អ្នកស្លាប់មាន២២នាក់ ចំណែកអ្នករងរបួស៣០នាក់ផ្សេងទៀត បញ្ជូនទៅសង្គ្រោះនៅមន្ទីរពេទ្យ។
អ្នកនាំពាក្យខាងស្ថានីយ៍រថភ្លើងថ្លែងថា មូលហេតុដោយសារមនុស្សនៅលើស្ពាននោះច្រើនពេក ហើយពួកគេព្យាយាម រត់ទៅឡើងរថភ្លើងនៅពេលជាមួយគ្នា ខណៈភ្លៀងធ្លាក់ខ្លាំង។
នៅឥណ្ឌាមានអ្នកធ្វើដំណើរតាមរថភ្លើងក្នុង១ថ្ងៃជាង ២០លាននាក់ ចំណែកផ្លូវស្ថានភាពរថភ្លើង និង ផ្លូវដែករងការរិះគន់ថា សម្ភារមួយចំនួនគឺចាស់ហូសការកំណត់ និងមិនត្រូវស្តង់ដាដែលងាយបង្កគ្រោះថ្នាក់។