មន្ត្រីគណបក្សភឿថៃ បានថ្លែងប្រាប់សារព័ត៌មានCNN កាលពីម្សិលមិញថា លោកស្រី យីង ឡាក់ កំពុងតែស្នាក់នៅក្នុងទីក្រុងឡុងដ៏ ហើយស្វែងរកសិទ្ធិជ្រកកោនផ្នែកនយោបាយនៅក្នុងប្រទេសអង់គ្លេសនេះ បន្ទាប់រត់គេចចេញពីប្រទេស។
តុលាការកំពូលរបស់ថៃ កាលពីថ្ងៃពុធ បានប្រកាសសេចក្តីសម្រេចរបស់ខ្លួនដោយកាត់ទោសឲ្យលោកស្រី យីង ឡាក់ជាប់ពន្ធនាគារចំនួន៥ឆ្នាំ ពីបទធ្វើឲ្យបាត់បង់លុយជាតិប្រមាណ៨ពាន់លានដុល្លារ លើគម្រោង ទិញស្រូវពីកសិករក្នុងតម្លៃសមរម្យ កាលលោកស្រី កាន់តំណែងជានាយករដ្ឋមន្ត្រី ពីឆ្នាំ២០១១ ដល់ឆ្នាំ ២០១៤។ នៅពេលប្រកាសសាលដីការបស់តុលាការនោះ មិនមានវត្តមានលោកស្រី យីង ឡាក់នោះទេ គឺមានតែអ្នកគាំទ្រដែលប្រមូលផ្តុំនៅទីនោះ។
មេដឹកនាំយោធាថៃ លោក ប្រា យុទ្ធចាន់អូចា ថ្លែងកាលពីថ្ងៃព្រហស្បតិ៍ម្សិលមិញថា លោកស្រី យីង ឡាក់កំពុងរស់នៅក្នុងទីក្រុងឌូបៃនៃប្រទេសអារ៉ាប់រួម។ ប៉ុន្តែមានប្រភពព័ត៌មាន បានប្រាប់CNNថា លោកស្រី យីង ឡាក់បានចាកចេញពីទីក្រុង ឌូបៃទៅចក្រភពអង់គ្លេសកាលពី ពីរសប្តាហ៍មុន។ មេដឹកនាំយោធា ថៃ លោកប្រាយុទ្ធ ចាន់អូចា ថ្លែងថា លោកនឹងរៀបចំសហការជាមួយប្រទេសនានាដើម្បីចាប់ខ្លួន លោកស្រី យីង ឡាក់ ទៅផ្តន្ទាទោសតាមច្បាប់ ដោយលោកថា ច្បាប់គឺជា ច្បាប់។