រុស្ស៊ីកាលពីថ្ងៃសុក្រម្សិលមិញ ប្រកាសបើកកិច្ចសហប្រតិបត្តិការជួយគ្នាទៅវិញទៅមកជាមួយសហរដ្ឋអាមេរិកក្នុងការដោះស្រាយបញ្ហាសំខាន់ដែលកំពុងកើតមានលើពិភពលោក។
រដ្ឋមន្ត្រីក្រសួងការបរទេសរុស្ស៊ីលោក Sergei Lavrov ថ្លែងបែបនេះនៅក្នុងកិច្ចប្រជុំជាមួយក្រុមអ្នកស្រាវជ្រាវនយោបាយអាមេរិកកាលពីថ្ងៃសុក្រម្សិលមិញ។លោកថ្លែងថា ប្រទេសទាំងពីរត្រូវមានកិច្ចសហប្រតិបត្តិការជាច្រើនដើម្បីដោះស្រាយបញ្ហាប្រឈមនៅចំពោះមុខ ពាក់ព័ន្ធទៅផលប្រយោជន៍ជាអន្តរជាតិមិនមែនសំដៅតែលើប្រយោជន៍ប្រទេសទាំងពីរនោះទេ។ នេះបើតាមទីភ្នាក់ងារព័ត៌មានរដ្ឋចិនស៊ីនហួរ។
រដ្ឋមន្ត្រីការបរទេសរូបនេះបានថ្លែងទៀតថា ករណីនៅប្រទេសស៊ីរីគឺជាឧទាហរណ៍មួយដែលមិនទាន់បើកចំហក្នុងការដោះស្រាយ។លោកបញ្ជាក់ថា ត្រូវតែមានការសហការដោយបើកទូលាយ និង ស្មោះត្រង់ដើម្បីគ្រប់គ្រងកងកម្លាំងប្រដាប់អាវុធ និង ទប់ទល់សកម្មភាពភេរវកម្មផ្សេងៗ។
ទោះយ៉ាងណាមិនទាន់មានការឆ្លើយជាផ្លូវការណាមួយពីររដ្ឋអំណាចទីក្រុងវ៉ាស៊ីនតោនជុំវិញការលើកឡើងរបស់រដ្ឋអំណាចទីក្រុងម៉ូស្គូនេះទេ។ មួយរយៈចុងក្រោយនេះមហាអំណាចទាំងពីរមានការប្រឈមមុខដាក់គ្នាខ្លាំង រហូតដល់ការកាត់បន្ថយមន្ត្រីទូតរៀងៗខ្លួន ដោយសារសហរដ្ឋអាមេរិកចោទរុស្ស៊ីថា ជ្រៀតជ្រែកចូលកិច្ចការបោះឆ្នោតរបស់អាមេរិក និងចោទថា រុស្ស៊ីឈ្លានពានដែនដីគ្រីមៀរបស់អ៊ុយគ្រែន។
ប្រែសម្រួលដោយពៅ មេត្តា