សេចក្ដីរាយការណ៍ពីទីភ្នាក់ងារព័ត៌មានអន្តរជាតិ បានឲ្យដឹងថា ក្រុងវ៉ាស៊ីងតោន បានបើកច្រកទៅរកកូរ៉េខាងជើង ដើម្បីស្វែងយល់ថា តើរបបនេះត្រៀមខ្លួនជជែកអំពីការបោះបង់កម្មវិធីអាវុធនុយក្លេអ៊ែរហើយឬនៅ។
ទីភ្នាក់ងារព័ត៌មាន AFP បានចុះផ្សាយបែបនេះ ដោយបានដកស្រង់សម្ដីរដ្ឋមន្ត្រីការបរទេសអាមេរិក លោក Rex Tillerson ដែលបានថ្លែងនៅថ្ងៃនេះ។
ខុទ្ទកាល័យប្រមុខកាទូតអាមេរិករូបនេះ បានបញ្ជាក់យ៉ាងលឿនថា កូរ៉េខាងជើងគ្មានបង្ហាញចំណាប់អារម្មណ៍លើការពិភាក្សានោះឡើយ។
ថ្លែងមួយថ្ងៃក្រោយពីជជែកជាមួយប្រធានាធិបតីចិន លោក ស៊ី ជិនពីង និងក្រុមមន្ត្រីការទូតកំពូលៗនោះ លោក Tillerson បានប្រាប់ក្រុមអ្នកយកព័ត៌មានថា ក្រុមមន្ត្រីអាមេរិកបានរក្សាទំនាក់ទំនងជាក្រុងព្យុងយ៉ាង។
ការទម្លាយឲ្យដឹងអំពីច្រកជជែកគ្នានេះ បានកើតឡើងបន្ទាប់ពីភាពតឹងតែងនៃសង្គ្រាមពាក្យសម្ដីរវាងប្រធានាធិបតី ដូណាល់ ត្រាំ និងមេដឹកនាំកូរ៉េខាងជើង លោក គីម ជុងអ៊ុន ហើយលោក Tillerson បានអំពាវនាវឲ្យរក្សាភាពស្ងប់ស្ងាត់។
លោក Tillerson ត្រូវបានអ្នកសារព័ត៌មានចោទសួរថា តើលោកអាចដឹងបានយ៉ាងម៉េចថា កូរ៉េខាងជើងពិចារណាងាកមកតុចរចា ក្រោយរងទណ្ឌកម្មបន្ថែមនោះ។ ជាការឆ្លើយតប លោកប្រាប់ថា៖ «យើងកំពុងតែស្ទាបស្ទង់ ដូច្នេះ ចូរបន្តតាមដាន»៕