រដ្ឋាភិបាលកាតាឡាន់ បាននិយាយថា ប្រជាជនប្រហែល ២.២៦លានដុល្លារ បានចេញទៅបោះឆ្នោតប្រជាមតិ កាលពីថ្ងៃម្សិលមិញនេះ ហើយ ៩០ភាគរយនៃអ្នកបោះឆ្នោត បានសម្រេចបោះឆ្នោតជ្រើសរើសការចាកចេញពីប្រទេសអេស្ប៉ាញ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
Reuters បានផ្សាយបន្តថា តួលេខនេះបង្ហាញថា ប្រជាជននៅតំបន់កាតាឡាន់ប្រហែល ៤២.៣ភាគរយ នៅក្នុងចំណោមប្រជាជនសរុប ៥.៣៤លាននាក់ បានចេញទៅបោះឆ្នោត កាលពីថ្ងៃម្សិលមិញនេះ ជាការបោះឆ្នោតដែលត្រូវបានរដ្ឋាភិបាលអេស្ប៉ាញហាមឃាត់។
មេដឹកនាំតំបន់កាតាឡាន់ លោក Carles Puigdemont បាននិយាយថា តំបន់ភាគឦសានអេស្ប៉ាញមួយនេះដែលលោកគ្រប់គ្រងនោះ មានសិទ្ធិក្លាយជារដ្ឋឯករាជ្យ បន្ទាប់ពីមនុស្សរាប់លាននាក់ចេញទៅបោះឆ្នោត នៅក្នុងការបោះឆ្នោតប្រជាមតិសម្រាប់ឯករាជ្យ។
លោកបានប្រកាសតាមទូរទស្សន៍ថា ជាថ្ងៃប្រកបដោយក្ដីសង្ឃឹម និងការឈឺចាប់នោះ ពលរដ្ឋកាតាឡាន់ បានឈ្នះសិទ្ធិឆ្ពោះទៅជារដ្ឋឯករាជ្យ នៅក្នុងទម្រង់សាធារណរដ្ឋ។
លោក Puigdemont បានថ្លែងបែបនេះ បន្ទាប់ពីការថ្លែងតាមទូរទស្សន៍របស់នាយករដ្ឋមន្ត្រីអេស្ប៉ាញ លោក Mariano Rajoy បានបានបដិសេធឯករាជ្យភាពតំបន់នេះ និងបានចោទក្រុមផ្ដាច់ខ្លួនថា បានព្យាយាមជំរិតប្រទេសជាតិទាំងមូល។ លោក Mariano Rajoy បានប្រកាសផ្ដល់ការចរចាដល់គ្រប់ភាគីទាំងអស់ អំពីអនាគតនៃតំបន់នេះ។
ក្រុមមន្ត្រីកាតាឡាន់ បាននិយាយថា មនុស្សជាង ៨០០នាក់ បានរងរបួសនៅពេលប៉ះទង្គិចគ្នាជាមួយប៉ូលិសបង្ក្រាបបាតុកម្មអេស្ប៉ាញ អំឡុងពេលការបោះឆ្នោតប្រជាមតិនោះ ដែលធ្វើឲ្យប្រទេសអេស្ប៉ាញធ្លាក់ទៅក្នុងវិបត្តិរដ្ឋធម្មនុញ្ញដ៏ជ្រាលជ្រៅបំផុត នៅក្នុងប៉ុន្មានទសវត្សរ៍មកនេះ និងបានជំរុញឲ្យមានការបាក់បែកកាន់តែជ្រៅរវាងរដ្ឋាភិបាលក្រុងម៉ាទ្រីដ និងក្រុងបាសេឡូណា៕
