អង្គការកម្មវិធីស្បៀងអាហារពិភពលោក នៅថ្ងៃនេះ បានអំពាវនាវស្វែងរកជំនួយ ៧៥លានដុល្លារសម្រាប់រយៈពេល ៦ខែខាងមុខ ដោយថា ដើម្បីជួយដល់ជនភៀសខ្លួនរ៉ូហ៊ីងយ៉ា ដែលបានរត់ភៀសខ្លួនចេញពីប្រទេសភូមា។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
ចាប់តាំងពីថ្ងៃទី២៥ ខែសីហាមក ជនជាតិរ៉ូហ៊ីងយ៉ាជិតកន្លះលាននាក់ហើយ បានរត់ភៀសខ្លួនពីផ្ទះសម្បែងរបស់ពួកគេនៅក្នុងប្រទេសភូមា ចូលទៅប្រទេសបង់ក្លាដែស រស់នៅក្រោមជំនួយអន្តរជាតិ។
ក្រោយពីទៅទស្សនាជំរុំជនភៀសខ្លួននៅក្នុងប្រទេសបង់ក្លាដែសជិតព្រំដែនប្រទេសភូមា នាយកប្រតិបត្តិអង្គការកម្មវិធីស្បៀងអាហារពិភពលោក លោក David Beasley បានប្រាប់អ្នកយកព័ត៌មានថា អង្គការនេះត្រូវការជំនួយ ៧៥លានដុល្លារសម្រាប់រយៈពេល ៦ខែបន្ទាប់។
អង្គការសហប្រជាជាតិ កំពុងតែស្វះស្វែងរកជំនួយ ២០០លានដុល្លារពីម្ចាស់ជំនួយ ដើម្បីដោះស្រាយវិបត្តិនៅក្នុងចំណោមជនមូស្លីមរ៉ូហ៊ីងយ៉ា៕
