មេដឹកនាំដែនដីភាគឦសានជារដ្ឋស្វ័យយ័ត្ននៃប្រទេសអេស្ប៉ាញថ្លែងថា ពួកគេត្រៀមប្រកាសឯករាជ្យនៅពេលឆាប់ៗនេះ ខណៈមានភាពចម្រូងចម្រាស់ខ្លាំង ហើយខាងរដ្ឋាភិបាលកំពុងតែត្រៀមរៀបចំបង្ក្រាបដោយចាត់វិធានការតាមផ្លូវច្បាប់។
នៅក្នុងបទសម្ភាសន៍ជាមួយសារព័ត៌មាន BBC លើកដំបូង ចាប់តាំងពីការបោះឆ្នោតស្ទង់មតិកាលពីថ្ងៃអាទិត្យមកនោះ លោកប្រធានាធិបតីដែនដី Catalonia លោក Carles Puigdemont ថ្លែងថា រដ្ឋាភិបាលរបស់លោកនឹងប្រកាសឯករាជ្យនៅចុងសប្តាហ៍នេះ ឬនៅសប្តាហ៍បន្ទាប់។
នៅពេលដែលមានការចោទសួរថា ចុះបើមានការបង្ក្រាបពីរដ្ឋាភិបាលអេស្ប៉ាញ តើនឹងមានការអ្វីកើតឡើង? លោកថ្លែងថា នោះវាអាចនឹងមានការផ្លាស់ប្តូរលើគម្រោងនេះ។
ស្របពេលជាមួយគ្នានេះ ក្សត្រអេស្ប៉ាញសម្តេច Felipe VI ថ្លែងថា អ្នកដែលរៀបចំបោះឆ្នោតធ្វើការស្ទង់មតិដោយរដ្ឋស្វ័យមួយនេះ មិនមានការយល់ព្រមពីរដ្ឋាភិបាលកណ្តាលគឺជា ទង្វើខុសច្បាប់។ ព្រះអង្គថា ក្នុងស្ថានភាពនេះ ប្រទេសកំពុងជូបបញ្ហាត្រូវតែមានការរួបរួមគ្នា។
ប្រជាពលរដ្ឋស្ទើរទាំងអស់នៅក្នុងដែនដី Catalonia បានផ្ទុះការតវ៉ា ប្រឆាំងនគរបាលអេស្ប៉ាញនៅថ្ងៃបោះឆ្នោត នាំឲ្យមានហិង្សាបណ្តាលឲ្យពលរដ្ឋជិត៩០០នាក់ និង នគរបាល៣៣នាក់ រងរបួស។
លោក Puigdemont ថ្លែងថា ពេលនេះ មិនមានការទំនាក់ទំនងជាមួយរដ្ឋាភិបាលអេស្ប៉ាញជុំវិញការផ្ទេអំណាចទៅរដ្ឋអំណាចនៃដែនដីរបស់លោកនោះទេ។
ស្ថានភាពនៅក្នុងដែនដី Catalonia នៅពេលនេះ កំពុងតែមានភាពចលាចល សាលារៀន មន្ទីរពេទ្យ ហាងលក់ទំនិញ និងរោងចក្រជាច្រើនទៀតត្រូវបានបិទ ឬ មានបើកដំណើរការតិចតួចបំផុត។
នាយករដ្ឋមន្ត្រីអេស្ប៉ាញលោក Mariano Rajoy ថ្លែងថា ការធ្វើប្រជាមតិនេះគឺជាការជាន់ឈ្លីដល់របបលទ្ធិប្រជាធិបតេយ្យ។
កាលពីព្រឹកថ្ងៃអង្គារម្សិលមិញ រដ្ឋមន្ត្រីក្រសួងមហាផ្ទៃនៃរដ្ឋាភិបាលអេស្ប៉ាញ លោក Juan Ignacio Zoido ថ្លែងថា រដ្ឋាភិបាល Catalonia កំពុងតែធ្វើការបះបោរនាំ ប្រជាពលរដ្ឋឡើងលើផ្លូវ។ លោកថា រដ្ឋាភិបាលកណ្តាលនឹងដាក់សម្ពាធសព្វបែបយ៉ាងបើសិនជាករណីចាំបាច់កើតមានឡើង ដើម្បីបញ្ចប់ហិង្សាផ្សេងៗ។
Catalonia គឺជាដែនដីស្វ័យយ័ត្ននៅភាគឦសាន្តនៃប្រទេសអេស្ប៉ាញ នៅជាប់ឆ្នេរសមុទ្រ។ ដែនដីនេះមានប្រជាជនជាង ៧,៥លាននាក់ តាមរបាយការណ៍កាលពីឆ្នាំ២០១៦ ហើយមានផ្ទៃដីជាង ៣២ ០០០ គីឡូម៉ែត្រការ៉េ៕