ក្រុមឃ្លាំមើលអាវុធគីមីរបស់ពិភពលោក បាននិយាយថា ឃ្លាំងអាវុធគីមីរបស់កូរ៉េខាងជើង គឺជាក្ដីកង្វល់សម្រាប់សន្តិភាព និងស្ថេរភាពនៅលើឧបទ្វីបកូរ៉េ និងតំបន់។ នេះដោយយោងតាមសេចក្ដីរាយការណ៍របស់ទីភ្នាក់ងារព័ត៌មាន AFP។
AFP បានផ្សាយថា អគ្គនាយកអង្គការហាមឃាត់អាវុធគីមី លោក Ahmet Uzumcu បានជំរុញទៅបណ្ដាប្រទេសនានាឲ្យដាក់សម្ពាធលើក្រុងព្យុងយ៉ា ឲ្យបោះបង់ចោលកម្មវិធីផលិតអាវុធរបស់ខ្លួន។
លោក Uzumcu បានប្រាប់ថា កូរ៉េខាងជើង ត្រូវបានវាយតម្លៃថា អាចមានអាវុធគីមីចន្លោះពី ៣ពាន់ ទៅ ៥ពាន់គ្រាប់។
ក្រុងព្យុងយ៉ាង បានប្រកាសជាសាធារណៈថា ខ្លួនពុំមានអាវុធគីមីនោះទេ។ ប៉ុន្តែ យោងតាមអង្គការ Nuclear Threat Initiative ដែលមានមូលដ្ឋាននៅទីក្រុងវ៉ាស៊ីងតោន បានឲ្យដឹងថា រដ្ឋឯកោមួយនេះ មានថ្នាំគីមីគ្រោះថ្នាក់ ដូចជាថ្នាំគីមី VX និងសារីន ជាដើម។
លោក Uzumcu បាននិយាយថា សហគមន៍អន្តរជាតិ គួរតែបារម្ភអំពីកូរ៉េខាងជើង ដោយសារតែភាពមិនអាចព្យាករទុកបានអំពីរដ្ឋឯកោមួយនេះ។
លោកបន្ថែមថា សហគមន៍អន្តរជាតិគួរតែដាក់សម្ពាធបន្ថែម ដើម្បីឲ្យក្រុងព្យុងយ៉ាង ចុះលើហត្ថលេខាលើសន្ធិសញ្ញាអាវុធគីមី ដែលមានបំណងហាមឃាត់ការផលិតអាវុធគីមីនៅលើពិភពលោក៕