ប្រធានាធិបតីហ្វីលីពីន លោក រ៉ូទ្រីហ្កូ ឌូទើតេ កាលពីថ្ងៃម្សិលមិញនេះ បានប្ដេជ្ញាដាក់ពាក្យបណ្ដឹងដកហូតសេចក្ដីទុកចិត្ត ប្រឆាំងនឹងប្រមុខស្ថាប័នប្រឆាំងអំពើពុករលួយរបស់ប្រទេសនេះ ក្រោយពីមេប្រឆាំងពុករលួយប្រទេសនេះ បានបើកការស៊ើបអង្កេតទៅលើការចោទថា លោក ឌូទើតេ មានលុយរាប់លានកោដិប៉េសូនៅក្នុងធនាគារដោយមិនបានប្រកាសជាសាធារណៈ។ នេះដោយយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។
Reuters បានរាយការណ៍បន្តថា មេដឹកនាំឆេវឆាវរូបនេះនិយាយថា លោកក៏ចង់ដកហូតតំណែងប្រធានតុលាការកំពូលដែរ ដោយលោកចោទមេស្ថាប័នរូបនេះ បានអនុញ្ញាតឲ្យក្រុមបក្សប្រឆាំងប្រើប្រាស់ធ្វើជាឧបករណ៍ ជុំវិញការព្យាយាមដកតំណែងលោក។
លោក ឌូទើតេ បានខឹងសម្បារយ៉ាងខ្លាំង នៅពេលទីភ្នាក់ងារប្រឆាំងអំពើពុករលួយ បានបញ្ជាក់កាលពីខែមុនថា ស្ថាប័ននេះនឹងបើកការស៊ើបអង្កេតលើការចោទថា លោក ឌូទើតេ មិនបានបង្ហាញទ្រព្យសម្បត្តិទាំងមូលរបស់លោក នៅក្នុងសេចក្ដីប្រកាសទ្រព្យសម្បត្តិ នៅពេលលោកនៅកាន់តំណែងជាចៅហ្វាយក្រុងនៅភាគខាងត្បូង មុននឹងលោកក្លាយជាប្រធានាធិបតី។
លោក ឌូទើតេ បានថ្លែងថា ទាំងប្រធានតុលាការកំពូល អ្នកស្រី Maria Lourdes Sereno និងប្រធានអង្គភាពប្រឆាំងអំពើពុករលួយ អ្នកស្រី Carpio-Morales នឹងជួបរឿងឈឺចាប់ នៅពេលរកមិនឃើញលុយនោះ។ លោកបន្ថែមថា មេស្ថាប័នទាំងពីរ នឹងត្រូវបង្ហាញសាធារណជនអំពីគណនីធនាគារផ្ទាល់ខ្លួន រួចហើយលាលែងចេញពីតំណែង។
លោក ឌូទើតេ លើកឡើងថា អ្នកស្រី Sereno មិនបានបង្ហាញរដ្ឋាភិបាលអំពីទឹកប្រាក់ជាង ៦០ម៉ឺនដុល្លារដែលរកបានអំឡុងពេលធ្វើជាមេធាវីឯកជននៅក្នុងសំណុំរឿងព្រលានយន្តហោះនោះទេ។
យ៉ាងណា អ្នកស្រី Sereno មិនត្រូវបានគេទាក់ទងសុំអត្ថាធិប្បាយបានភ្លាមៗទេ ប៉ុន្តែ មេធាវីរបស់អ្នកស្រីនិយាយថា ពួកគេត្រៀមខ្លួនរួចរាល់ក្នុងការឆ្លើយតបនឹងពាក្យបណ្ដឹងពីប្រធានាធិបតីហ្វីលីពីន ហើយអ្នកស្រីនឹងបង្ហាញថា អ្នកស្រីមិនបានប្រព្រឹត្តខុសនោះឡើយ៕
