រដ្ឋាភិបាលបង់ក្លាដេសប្រកាសនៅព្រហស្បតិ៍ម្សិលមិញថា ប្រទេសនេះនឹងសាងសង់ជំរុំជនភៀសខ្លួនធំជាងគេលើពិភពលោកដែលមានផ្ទះក្នុងនោះជាង៨០០ ០០០ផ្ទះ សម្រាប់ឲ្យជនជាតិភាគតិចរ៉ូហ៊ីងយ៉ាកាន់សាសនាឥស្លាមដែលរត់គេចចេញពីអំពើហិង្សានៅក្នុងប្រទេសមីយ៉ាន់ម៉ាស្នាក់នៅ។
ចាប់ពីថ្ងៃទី២៥ខែសីហាមកក្រោយពេលផ្ទុះហិង្សារបស់ពួកយោធាបង្ក្រាបលើ ជនជាតិភាគតិចរ៉ូហ៊ីងយ៉ានៅក្នុងរដ្ឋរ៉ាក់ឃីន បណ្តាលឲ្យជនជាតិរ៉ូហ៊ីងយ៉ាប្រមាណជាង៥០ម៉ឺននាក់រត់គេចចេញពីមីយ៉ាន់ម៉ាឆ្លងដែនចូលប្រទេសបង់ក្លាដេស។
រដ្ឋមន្ត្រីរបស់បង់ក្លាដេសថ្លែងប្រាប់AFPថា ជំរុំដែលធ្វើឡើងធំទូលាយនេះគឺសម្រាប់ជនជាតិភាគតិចរ៉ូហ៊ីងយ៉ា ដែលរងគ្រោះពីក្រុមយោធាមីយ៉ាន់ម៉ាដុតបំផ្លាញផ្ទះ និង ដេញបាញ់សម្លាប់ដោយចោទពួកគេថា ជាជនបះបោរផ្តាច់ខ្លួន។
ផ្ទៃដីដែលរៀបចំសាងសង់ជំរុំឲ្យជនភៀសខ្លួននេះ មានទំហំដីប្រមាណ៧៩០ ហិកតា នៅជាប់ជាមួយជំរុះ Kutupalong។