គណបក្សកុម្មុនីស្តវៀតណាមបានសម្រេចបណ្តេញមន្ត្រីជាន់ខ្ពស់មួយរូបចេញពីបក្សដោយសារតែចោទថា មានការពាក់ព័ន្ធនិងអំពើពុករលួយ នាំឲ្យមានការខឹងសម្បារពីមន្ត្រីថ្នាក់ក្រោម ខណៈវៀតណាមមានការរឹតបន្តឹងខ្លាំងចំពោះការសូកប៉ាន់ ពុករលួយ។
ថ្មីៗនេះ មន្ត្រីធនាគារជាង ៥០នាក់ រួមទាំងអតីតប្រធានក្រុមហ៊ុនប្រេងរបស់រដ្ឋ Petro Vietnam ត្រូវបានចាប់ឃុំខ្លួននិង បញ្ជូនទៅតុលាការកាត់ទោស។
ប្រធានបក្សកុម្មុនីស្តនៅទីក្រុងដាណាង ជាទីក្រុងធំមួយរបស់វៀតណាម លោក Nguyen Xuan Anh អាយុ៤១ឆ្នាំ ត្រូវបានបណ្តេញចេញពីជួរបក្សកាលពីថ្ងៃសុក្រម្សិលមិញបន្ទាប់ពីរកឃើញថា មានរឿងអាស្រូវ ពួករលួយ ធ្វើឲ្យមន្ត្រីនៅក្រោមបង្ក្រាប់មានការមិនពេញចិត្ត នេះបើតាមទីភ្នាក់ងារព័ត៌មាន AFP។
លោក Nguyen Xuan Anh ត្រូវបានចោទជាច្រើនករណី រួមទាំងការទទួលបានរថយន្តពីក្រុមហ៊ុន ការទទួលបានសញ្ញាបត្របណ្ឌិតពីសាកលវិទ្យាល័យនៅអាមេរិក ដោយមិនមានការទទួលស្គាល់ពីក្រសួងអប់រំ និង បណ្តុះបណ្តាលជីវិតរបស់វៀតណាមជាដើម។
គណបក្សកុម្មុយនីស្តវៀតណាម ដាក់គោលដៅសំខាន់ក្នុងប្រយុទ្ធប្រឆាំងអំពើពុករលួយគឺមន្ត្រីជាន់ខ្ពស់អាចត្រូវបណ្តេញចេញពីតំណែងហើយបញ្ជូនទៅឲ្យតុលាការកាត់ទោស ក្រោយពេលរកឃើញថា បានប្រព្រឹត្តអំពើពុករលួយ។ ប្រទេសនេះ មានការវិត្តន៍ទៅចំណាត់ថ្នាក់ល្អ ចាប់ពីឆ្នាំ២០១២មានចំណាត់ថ្នាក់១៧៦ ហើយនៅឆ្នាំ២០១៦មានចំណាត់១១៣ ក្នុងបញ្ជីរបស់អង្គការតម្លាភាពអន្តរជាតិដែលធ្វើសន្ទស្សន៍ពុករលួយ។