មន្ត្រីសហជីពសហព័ន្ធកម្មករចំណីអាហារកម្ពុជាថា សកម្មភាពគំរាមកំហែងឲ្យកម្មការនីរំលូតកូន ដើម្បីរក្សាការងារខ្លួននៅតែកើតមាននៅកម្ពុជា ដោយថាសកម្មភាពនេះធ្វើឡើងដោយបានបិទបាំងពីមជ្ឈដ្ឋានសង្គម។
ក្នុងវេទិការសុវត្ថិភាពការងារនិងមុខរបរ ដែលបានរៀបចំដោយមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យនៅថ្ងៃទី៨នេះ អនុប្រធានសហព័ន្ធសហជីពកម្មករចំណីអាហារកម្ពុជាលោកស្រី អ៊ូ ទេពផល្លីន បានថ្លែងថារហូតមកដល់ពេលបច្ចុប្បន្ននេះ សកម្មភាពរំលោភបំពានពីសំណាក់ថៅកែបង្ខំឲ្យកម្មការនីរោងចក្រ ជាពិសេសទៅលើអ្នកធ្វើការនៅហាងខារ៉ាអូខេ រំលូតកូនដើម្បីរក្សាការងារ គឺនៅតែកើតមានដដែលដែលស្ថិតក្នុងរូបភាពបិទបាំងហើយជនរងគ្រោះមិនហ៊ានតវ៉ា និងដាក់ពាក្យប្តឹងនោះទេ។
លោកស្រីថា៖ «គាត់គិតថាគាត់ធ្វើការបីខែបួនខែអីទៅគាត់គិតថាពេលពោះគាត់ធំចាំគាត់ឈប់ នៅពេលដែលគេដឹងគេថាកន្លែងយើងអត់អាចទទួលបានទេព្រោះកន្លែងយើងជាកន្លែងដែលសប្បាយបើសិនជាចង់មានការងារធ្វើត្រូវតែអត់កូន។ ភាសាហ្នឹងគឺបង្ខំឲ្យស្ត្រីអត់ជំរើស អញ្ចឹងដោយសារមួយចំនួនទៅដោយសារគាត់ខ្មាស់អៀនទៅនឹងការងារទើបគាត់អត់ហ៊ានទៅពេទ្យ គាត់ទៅទិញថ្នាំទម្លាក់កូនដោយខ្លួនឯង នៅពេលដែលគាត់ត្រូវបានគេហាមមិនឲ្យគាត់ញាំស្រា ញាំទឹកកកព្រោះវាសាប នៅពេលដែលល្ងាចឡើងពេលដែលភ្ញៀវបង្ខំធ្វើឲ្យអាការៈហ្នឹងឈាមធ្លាក់មកអត់អស់ ចុកក៏មានដែរ។ ខ្ញុំឃើញថាកន្លែងខារ៉ាអូខេមានច្រើនណាស់»។
ទោះជាយ៉ាងណាលោកស្រីថាដោយសារឥទ្ធិពលអំណាចរបស់ថៅកែ រោងចក្រ ក៏ដូចជាម្ចាស់ហាងខារ៉ាអូខេ និងអំពើពុករលួយ បានធ្វើឲ្យជនរងគ្រោះពីអំពើនេះមិនហ៊ានដាក់ពាក្យប្តឹង ឬចេញមុខមកបញ្ជាក់នោះទេ។
មេកានៅហាងខារ៉ាអូខេម្នាក់ កញ្ញា ហៀង ស្រីពៅ ថាជាទូទៅក្នុងរយៈពេល១ខែម្តង ថៅកែហាងតែងតែឲ្យស្ត្រីខារ៉ាអូខេ ធ្វើការពិនិត្យទឹកនោមម្តង ដើម្បីឲ្យប្រាកដថា ស្ត្រីទាំងនោះគ្មានកូន និងអាចបន្តការងារបាន។
កញ្ញាថា៖ «ខ្ញុំថា គួរតែមានវិធានការហើយ។ ការដែលមានផ្ទៃពោះ ហើយថៅកែហាងនិយាយថា គេអត់ឲ្យពួកយើងទៅរំលូតទេ តែបើយើងអត់បានរំលូតយើងបាត់បងការងារ។ បើយើងអត់បាន ទៅរំលូតយើងបាត់បង់ការងារអញ្ចឹងយើងធ្វើម៉េច សម្រេចចិត្តរំលូតដដែលហ្នឹង។ ហើយបើដឹងថា មានផ្ទៃពោះត្រូវបានបណ្តេញជាបន្ទាន់។ គេគិតថា យើងជាស្ត្រីដែលមានផ្ទៃពោះធ្វើ ធ្វើការកន្លែងគេធ្វើឲ្យគេបាត់បង់អតិថិជន បាត់បង់ភ្ញៀវ បាត់បង់ប្រាក់ចំណូល អញ្ចឹងស្នើហ្នឹងយើងជាមនុស្សចង្រៃ។ និយាយទៅ សម្ពោធគ្រប់កន្លែងហើយយើងដើរចេញពេលខ្លះទាំងយំ»។
វីអូឌី មិនអាចទាក់ទងអ្នកនាំពាក្យក្រសួងកិច្ចការនារី ដើម្បីឆ្លើយតបពីករណីនេះ បាននៅឡើយទេ ខណៈ ប្រធានក្រុមអ្នកនាំពាក្យនៃក្រសួងនេះ លោកស្រី យិន សារ៉ាត់ ថាលោកស្រី កំពុងរវល់ប្រជុំ។
អនុប្រធានអចិន្ត្រៃយ៍របស់គណៈកម្មាធិការជាតិប្រយុទ្ធប្រឆាំងការជួញដូរមនុស្ស លោកស្រី ជូ ប៊ុនអេង ថា មិនដឹងពីករណី ដែលថៅកែបង្ខំឲ្យបុគ្គលិកខ្លួនរំលូតកូន ដើម្បីបានធ្វើការងារបន្តនោះទេ។ លោកស្រី ចាត់ទុកករណីនេះ ជាអំពើល្មើស និងខុសច្បាប់។ ទោះជាយ៉ាងណា លោកស្រី មិនទាន់អាចបញ្ជាក់ពីវិធានការណ៍របស់រដ្ឋាភិបាលទៅលើករណីនេះ បាននៅឡើយទេ។
លោកស្រីជូ ប៊ុនអេង៖ «ដោយសារទើបតែឮ កុំអាលទាន់សួរខ្ញុំរឿងហ្នឹង! យើងចាំដាក់ចូលក្នុងកិច្ចប្រជុំពិភាក្សា តែឥឡូវនេះ ខ្ញុំកំពុងស្ថិតក្នុងអង្គប្រជុំមួយ ចាំរួចចាំទាក់ទងគ្នាទៀត»។
បើតាមរបាយការណ៍របស់អង្គការ Care ចេញផ្សាយកាលពីឆ្នាំ២០១៥ ឲ្យដឹងថា ស្រ្ដីប្រហែល៤ម៉ឺននាក់ កំពុងធ្វើការនៅក្នុងឧស្សាហកម្មផ្សព្វផ្សាយស្រាបៀរ នៅតាមភោជនីយដ្ឋាន ប៊ៀរហ្គាឌិន និងរាំងហ្គាសាលប្រមាណជា៤០០កន្លែង នៅរាជធានីភ្នំពេញ៕