នៅក្នុងសមាជបក្សកាលពីថ្ងៃសៅរ៍ទី៧ខែតុលាឆ្នាំ២០១៧ មេដឹកនាំកូរ៉េខាងជើង បានប្រកាសរុះរើតួនាទីមន្ត្រីជាន់ខ្ពស់ជាច្រើនរូប ហើយបានរៀបចំមន្ត្រីដែលស្និទ្ធនិងមានការទុកចិត្តខ្ពស់បំផុត។ ក្នុងចំណោមមន្ត្រីថ្មីនោះ ប្អូនស្រីពៅរបស់លោកដែលមានអាយុ៣០ឆ្នាំ លោកស្រី គីម យូជុង ត្រូវបានតែងតាំងជាសមាជិកគណៈកម្មការកណ្តាលគ្រប់គ្រងការិយាល័យនយោបាយ។
លោកស្រី គីម យូជុង ធ្លាប់បានចាកចេញពីប្រទេសកំណើតទៅប្រទេសស្វីស ជាមួយលោក គីម ជុងអ៊ុន ជាបងប្រុសក្នុងឆ្នាំ១៩៩៦ ដើម្បីបន្តការសិក្សានៅទីនោះ។ ស្រី្តរូបនេះ បានវិលត្រឡប់ចូលប្រទេសវិញនៅឆ្នាំ២០០០ ក្រោយពេលបញ្ចប់ការសិក្សា និងបានក្លាយជាអ្នកជំនាញខាងកុំព្យួទ័រ។
កាលពីឪពុករបស់នាងនៅមានជីវិតនៅក្នុងឆ្នាំ២០០២ លោក គីម ជុងអ៊ីល ធ្លាប់ថ្លែងជាសាធារណៈថា កូនស្រីពៅរបស់លោកគឺ គីម យូជុង ចូលចិត្តកិច្ចការនយោបាយណាស់ ហើយនាងចង់បានតំណែងមួយក្នុងរបបដឹកនាំកូរ៉េខាងជើង។
ទោះជាឪពុករបស់នាងធ្លាប់ លើកឡើងឈ្មោះជាសារណៈក៏ដោយ ប៉ុន្តែលោកស្រី គីម យូជុង មិនដែលបង្ហាញមុខជាសាធារណៈទេទោះ សូម្បីតែក្នុងអំឡុងពេលឪពុករបស់នាងស្លាប់នៅឆ្នាំ២០១១ ក៏មិនមានការបង្ហាញពីវត្តមានលេចធ្លោររបស់នាងដែរ។
អ្នកតាមដានស្ថានភាពនយោបាយរបស់កូរ៉េខាងជើងបានចាប់អារម្មណ៍ថា គីម យូជុង ហាក់បង្ហាញមុខនៅរាល់កម្មវិធីធំៗជាមួយបងប្រុសតាំងពីឆ្នាំ២០១៤។
ឆ្នាំ២០១៤នៅក្នុងប្រទេសកូរ៉េខាងជើងគេចាប់អារម្មណ៍ព្រិត្តិការណ៍សំខាន់គឺលោក គីម ជុងអ៊ុន បាត់មុខជាសាធារណៈរយៈពេល៦សប្តាហ៍នៅក្នុងអំឡុងខែកញ្ញា និងខែតុលា ឆ្នាំ២០១៤ ដែលពេលនោះមានការផ្សព្វផ្សាយថា មេដឹកនាំកូរ៉េខាងជើងដែលល្បីខាងសាកល្បងអាវុធនុយក្លេអ៊ែ រូបនេះ រងការឈឺចាប់ខ្លាំងដោយសារជំងឺទឹកនោមផ្អែម។ ប្រព័ន្ធផ្សាយនានា រួមទាំងសារព័ត៌មាន CNN ផងបានផ្សព្វផ្សាយថា លោក គីម ជុងអ៊ុន មានកើតជំងឺទឹកនោមផ្អែមតាំងពីឆ្នាំ២០០៩។
ឆ្នាំ២០១៣ ព្រិត្តិការណ៍គេចាប់អារម្មណ៍មួយទៀត គឺលោក គីម ជុងអ៊ុន បានធ្វើទារុណកម្ម និងសម្លាប់មន្ត្រីជាន់ខ្ពស់របស់ខ្លួនមួយក្រុម ក្នុងនោះក៏មានឪពុកមារបស់លោកផងដែរដោយចោទថា ក្បត់ជាតិ ចង់ផ្តួលរំលំរដ្ឋាភិបាល។ លោក Jang Song Thaek ជាឪពុកមារបស់លោក គីម ជុងអ៊ុន ដែលត្រូវបានសម្លាប់នៅពេលនោះ គឺជាមនុស្សដែលមានទំនាក់ទំនងល្អជាមួយកូរ៉េខាងត្បូង ហើយបង្ហាញជំហរចង់ឲ្យកូរ៉េទាំងពីរមានការបង្រួបបង្រួមគ្នាវិញ។
ងាកមកនិយាយពីលោកស្រី គីម យូជុង គឺត្រូវបានដំឡើងដំណែងអំឡុងពេលដែលបងប្រុសមានជំងឺនៅក្នុងឆ្នាំ២០១៤ ឲ្យកាន់ការងារជាអនុប្រធាននាយកដ្ឋានឃោសនាការ និង អប់រំនៅក្នុងបក្ស បន្ទាប់មកត្រូវបានដំឡើងតំណែងជាបន្តបន្ទាប់។
លោក Peter Hayes អ្នកស្រាវជ្រាវនៃមជ្ឈមណ្ឌលសម្រាប់ការសិក្សាសន្តិសុខអន្តរជាតិនៅក្នុងទីក្រុងស៊ីតនីនៃប្រទេសអូស្ត្រាលី ថ្លែងថា លោក គីម ជុងអ៊ីល បានគូសបញ្ជាក់តួនាទីឲ្យកូនស្រីរបស់លោក តាំងពីឆ្នាំ២០១០ មកម្លេះ។
កូរ៉េខាងជើងគឺជាប្រទេសផ្តាច់ការដឹកនាំដោយគ្រួសារ ត្រកូលគីមតែមួយ។ ក្រុមគ្រួសារលោក គីម ជុងអ៊ុន គ្រប់គ្រងកូរ៉េខាងជើង ចាប់តាំងពីឆ្នាំ១៩៤៨ គឺចាប់ពីឆ្នាំ១៩៤៨ដល់១៩៩៤ ដឹកនាំដោយ លោក គីម អ៊ីលស៊ុង ចាប់ពីឆ្នាំ១៩៩៤ដល់ឆ្នាំ២០១១ ដឹកនាំដោយលោក គីម ជុងអ៊ីល ចំណែកលោក គីម ជុងអ៊ុនដឹកនាំចាប់ពីឆ្នាំ២០១១រហូដល់បច្ចុប្បន្ន។ លោក គីម អ៊ីលស៊ុង ជាជីតា និងលោក គីម ជុងអ៊ីល ជាឪពុករបស់ លោក គីម ជុងអ៊ុន សុទ្ធតែកាន់អំណាចរហូតដល់ថ្ងៃស្លាប់ ទើបផ្ទេរបន្តទៅកូន។
លោក គីម ជុងអ៊ុន មេដឹកនាំកូរ៉េខាងជើងដែលកាន់តំណែងតាំងពីឆ្នាំ២០១១ ក្រោយពេលឪពុករបស់លោកស្លាប់ កាលនោះលោកទើបមានអាយុ២៨។ បច្ចុប្បន្នមេដឹកនាំកូរ៉េខាងជើងរូបនេះ ទើបមានកូនមួយឈ្មោះ Kim Ju-ae កើតកាលពីឆ្នាំ២០១២។
របបដឹកនាំរបស់កូរ៉េខាងជើងគ្រប់គ្រងដោយគ្រួសារគីម នឹងមានការផ្ទេរអំណាចដោយប្រយ័ត្នប្រយែងនោះ នាំឲ្យអ្នកតាមដានស្ថានភាពនយោបាយនានាសន្និដ្ឋានថា លោក គីម ជុងអ៊ុនរៀបចំផ្ទេរដំណែងឲ្យប្អូនស្រីពៅក្នុងពេលសមស្របណាមួយ ខណៈសុខភាពរបស់លោកមានបញ្ហា ហើយកូនរបស់លោកនៅក្មេងនៅឡើយ៕