រដ្ឋាភិបាលតួកគីនិងសហរដ្ឋអាមេរិកបានប្រកាសផ្អាកក្នុងការផ្តល់ទិដ្ឋការ(VISA) ទៅវិញទៅមក ដើម្បីពិនិត្យលើលក្ខខណ្ឌឡើងវិញ ក្រោមហេតុផលដើម្បីពង្រឹងសន្តិសុខ ដែលការសម្រេចនេះធ្វើឡើងក្រោយពេលដែលតួកគី បានចាប់ខ្លួនមន្ត្រីធ្វើការនៅស្ថានកុងស៊ុលអាមេរិកកាលពីសប្តាហ៍មុន។
កាលពីសប្តាហ៍មុនមន្ត្រីបេសកកម្មធ្វើការនៅស្ថានកុងស៊ុលអាមេរិកប្រចាំនៅទីក្រុង អ៊ីស្តំប៊ុលនៃប្រទេសតួកគី ត្រូវសមត្ថកិច្ចចាប់ខ្លួន ដោយចោទថា មន្ត្រីរូបនេះ មានទំនាក់ទំនងជាមួយ ក្រុមបះបោរធ្វើរដ្ឋប្រហារទម្លាក់រដ្ឋាភិបាលកាលពីឆ្នាំមុនហើយបរាជ័យ។
សេចក្តីថ្លែងការណ៍របស់ស្ថានទូតអាមេរិកប្រចាំនៅតួកគីថ្លែងថា ស្ថានភាពនយោបាយថ្មីៗនេះ តម្រូវឲ្យអាមេរិកវាយតម្លៃឡើងវិញក្នុងការផ្តល់ទិដ្ឋការដល់ពលរដ្ឋតួកគីធ្វើដំណើរទៅអាមេរិក ក្រោមហេតុផលការពារសន្តិសុខ។ សេចក្តីថ្លែងការណ៍បញ្ជាក់ថា ការព្យួរទិដ្ឋការនេះ គឺអនុវត្តន៍ទាំងអស់ចំពោះទិដ្ឋការមិនមែនអន្តោប្រវេសន៍។នេះបើតាមទីភ្នាក់ងារព័ត៌មានរ៉យទ័រ។
ចំណែកស្ថានទូតតួកគីនៅក្នុងនៅសហរដ្ឋអាមេរិក ក៏បានធ្វើសេចក្តីថ្លែងការណ៍ក្នុងន័យដូចគ្នាដែរ ដែលស្ថានទូតអាមេរិកបានប្រកាសនេះដែរ៕