ស្ថានប័នជាន់ខ្ពស់នៃនគរបាលម៉ាឡេស៊ីបើកការស៊ើបអង្កេតលើវិឌីអូឃ្លីបមួយដែលបង្ហាញពីសកម្មភាពមន្ត្រីនគរបាលចំនួន៧នាក់ នៅកន្លែងលេងល្បែង ហើយពេលនោះនគរបាលបានជជែកលេងជាមួយថៅកែ ក្លឹបរាត្រី និង ខារ៉ាអូខេនោះទៀតផង។
តាមទីភ្នាក់ងារព័ត៌មានរបស់ម៉ាឡេស៊ី Bernama បានឲ្យដឹងថា ក្នុងចំណោមនគរបាលទាំង៧នាក់នោះគឺម្នាក់ជា ប្រធានអធិការកិច្ចនៃការិយាល័យនគរបាល Pagoh។
សកម្មភាពនោះ ត្រូវបានសង្គមម៉ាឡេស៊ីចាត់ទុកថា អាចមានអំពើមិនប្រក្រតីក្នុងការទំនាក់ទំនងរវាងអធិការកិច្ច និង ម្ចាស់ក្លឹបរាត្រីនោះ នឹងធ្វើឲ្យប៉ះពាល់ដល់កិត្តិយសរបស់សង្គមជាតិ។
អគ្គស្នងការនគរបាលអធិការកិច្ចលោក Mohamad Fuzi Harun ថ្លែងថា ពេលនេះ ក្រុមការងារកំពុងតែប្រមូលភស្តុតាងបន្ថែមទៀត ពីនគរបាលនៅក្នុងរដ្ឋ Johor ដើម្បីចាត់វិធានការតាមផ្លូវច្បាប់។ លោកបន្តថា ករណីនេះនឹងដំណើរការតាមយន្តការនៃការដាក់បណ្តឹងតាមនាយកដ្ឋានពិនិត្យនិង ស៊ើបអង្កេតនៃអគ្គស្នងការដ្ឋាននគរបាលជាតិ។
វីឌីអូរយៈពេល៨វិនាទី ដែលផ្សព្វផ្សាយតាមហេ្វសប៊ុកកាលពីថ្ងៃអាទិត្យបានបង្ហាញសកម្មភាពនគរបាលទាំងនេះ នៅក្នុងក្លឹបលេងល្បែង និង ខាងរ៉ាអូខេ ហើយជជែកលេងជាមួយថៅកែនោះ៕