ភ្លើងឆេះព្រៃប៉ុន្មានថ្ងៃមកនេះនៅរដ្ឋកាលីហ្វ័រញ៉ារបស់អាមេរិក បានរាលដាលដល់កន្លែងរស់នៅរបស់អ្នកភូមិ ១០កន្លែងនាំឲ្យពលរដ្ឋរាប់ម៉ឺននាក់ត្រូវជម្លៀសចេញ ហើយបានធ្វើឲ្យប៉ះពាល់ដល់កន្លែងផលិតស្រាទំពាំងបាយជូររបស់ប្រទេស។
កម្លាំងខ្យល់បក់ក្នុងល្បឿន ៨០គីឡូម៉ែត្រក្នុង១ម៉ោង កាន់តែធ្វើឲ្យភ្លើងឆេះរាលដាលនិង បណ្តាលឲ្យពលរដ្ឋរស់នៅតំបន់នោះជាង ២០ ០០០នាក់ត្រូវជម្លៀសទៅរកកន្លែងមានសុវត្ថិភាព។ បើតាមទីភ្នាក់ងារព័ត៌មាន AFP បានឲ្យដឹងថា ភ្លើងឆេះព្រៃនោះចាប់ផ្តើមតាំងពីយប់ថ្ងៃអាទិត្យ។
ក្រុមអ្នកពន្លត់អគ្គីភ័យចំនួន៧៣ ០០០នាក់ របស់រដ្ឋកាលីហ្វ័រញ៉ា ត្រូវបានបញ្ជូនទៅអន្តរាគមន៍លើករណីនេះ។ ហើយមានរបាយការណ៍ពីសមត្ថកិច្ចជាបឋមថា ក្រុមអ្នកពន្លត់អគ្គីភ័យនេះ ៧នាក់បានស្លាប់ក្នុងពេលបំពេញការងារ។ ក្រុមការងារជួយសង្គ្រោះខ្លះ ពន្លត់ភ្លើង ខ្លះទៅតាមផ្ទះប្រជាពលរដ្ឋ សាលារៀន និងព្រះវិហារជាដើម ដើម្បីជួយសង្គ្រោះ។
អាជ្ញាធររដ្ឋកាលីហ្វ័រញ៉ាបានប្រកាសថា អគារចំនួន១៥០០ រងការបំផ្លាញ នៅក្នុងតំបន់ចំនួនបី ដែលតំបន់ទាំងនោះល្បីបំផុតក្នុងការផលិតស្រាទំពាំងបាយជូរ។ តំបន់ដែលមានភ្លើងឆេះនោះ មានកន្លែងផលិតស្រាទំពាំងបាយជូរសំខាន់ៗជាង ៤០០កន្លែង ប៉ុន្តែគេមិនទាន់ដឹងលម្អិតថា ការប៉ះបាល់ដល់ទំហំប៉ុណ្ណានោះទេ៕