អគ្គិភ័យនៅរដ្ឋកាលីហ្វ័ញ៉ាអ្នក​ស្លាប់កើនដល់​១៥នាក់

អ្នកស្លាប់ដោយសារ អគ្គិភ័យឆេះព្រៃនៅក្នុងរដ្ឋកាលីហ្វ័រញ៉ា សហរដ្ឋអាមេរិក​កើនដល់​១៥នាក់ ចំណែកពលរដ្ឋរាប់ម៉ឺននាក់ផ្សេងទៀត គេចចេញពីផ្ទះទៅរកកន្លែងមានសុវត្ថិភាព។​

ភ្លើងចាប់ផ្តើមឆេះរាលដាល នៅក្នុងតំបន់ផលិតស្រាទំពាំងបាយជូរ ដែលសំខាន់មួយនៅក្នុងរដ្ឋ​កាលីហ្វ័រញ៉ា សហរដ្ឋអាមេរិក​ ចាប់តាំងពីយប់ថ្ងៃអាទិត្យ។​

អភិបាលរដ្ឋកាលីហ្វ័រញ៉ាថ្លែងថា ភ្លើងចាប់ផ្តើមឆេះរាលដាល នៅក្នុងតំបន់ចំនួន​៨ ក្នុងនោះរួមទាំងកន្លែងផលិតស្រាទំពាំងបាយជូរល្បីឈ្មោះផងគឺនៅតំបន់ Napa និង Sonoma។ ចំណែក​ក្រុមអ្នកពន្លត់អគ្គិភ័យបញ្ជូនទៅកាន់ទីតាំងទាំង៨កន្លែងនោះ។​

របាយការណ៍សមត្ថកិច្ចឲ្យដឹងថា ចំនួនអ្នកស្លាប់ទាំង១៥នាក់នោះគឺនៅ Sonoma ចំនួ​ន​៩នាក់ Mendocinoចំនួន​៣នាក់ Napa ចំនួន​២នាក់ និងនៅ Yuba ចំនួន​១នាក់។​ក្នុងចំណោមអ្នកស្លាប់ នៅក្នុងតំបន់​ Napa នោះមាន​ទាំងប្តីប្រពន្ធ១គូ ដែលម្នាក់​អាយុ៩៩ឆ្នាំ និង ម្នាក់ទៀតអាយុ១០០ឆ្នាំ ពួកគាត់បានរៀបការរយៈពេល ៧៥ឆ្នាំ។​

ចំណែករបាយការណ៍ពីតំបន់ នៅ Sonoma ដែលភ្លើងនៅតែបន្តឆេះនោះ គឺមនុស្សប្រមាណ​២០០នាក់បានបាត់ខ្លួន ហើយក្រុមជួយសង្គ្រោះនៅតែបន្តស្វែងរក៕