ស្ថាប័នព្រះបរមរាជវាំងរបស់ម៉ាឡេស៊ី បានធ្វើកិច្ចអន្តរាគមន៍លើកិច្ចការសាធារណៈ ដោយកម្រមួយកាលពីថ្ងៃអង្គារម្សិលមិញ ដោយអំពាវនាវឲ្យប្រជាជនទូទាំងប្រទេសមានការអត់ឱនផ្នែកសាសនា និងគោរពតាមរដ្ឋធម្មនុញ្ញព្រមទាំងច្បាប់ផ្សេងៗទៀត។
ការអន្តរាគមន៍របស់រាជវាំងនៅម៉ាឡេស៊ីនេះ កើតឡើងបន្ទាប់ពីអ្នកតាមដានបញ្ហាសង្គមសង្កេតឃើញថា នៅប៉ុន្មានខែចុងក្រោយនេះ ក្រុមអ្នកមានជំនឿសាសនា មិនមានការអត់ឱនគ្នានោះទេ។ ប្រទេសនេះ មានអ្នកកាន់សាសនា ឥស្លាមជាង៦០% និង មានសាសនាផ្សេងៗទៀតរួមមាន សាសនាព្រះពុទ្ធ គ្រិស្ត និងសាសនាហិណ្ឌូជាដើម។ នេះបើតាមទីភ្នាក់ងារព័ត៌មានរ៉យទ័រ។
ក្នុងសេចក្តីថ្លែងការណ៍ចេញផ្សាយកាលពីថ្ងៃអង្គារម្សិលមិញ ហើយផ្សព្វផ្សាយដោយទីភ្នាក់ងារព័ត៌មានរដ្ឋម៉ាឡេស៊ី Bernama គឺសម្តេចស៊ុលតង់ទី៩ បានលើកឡើងពីក្តីបារម្ភនៃការកើតមានជម្លោះសាសនា និងបានជំរុញឲ្យពលរដ្ឋគោរពរដ្ឋធម្មនុញ្ញ ដែលកំណត់ពីភាពចម្រុះនៃជំនឿសាសនា និង ចម្រុះជាតិសាសន៍។
ម៉ាឡេស៊ីមានប្រជាជនជាង ៣១លាននាក់ ជាប្រទេសកាន់សាសនាធំលំដាប់ទី២នៅក្នុងតំបន់ បន្ទាប់ពីប្រទេសឥណ្ឌូនេស៊ី។ បច្ចុប្បន្នម៉ាឡេស៊ីក៏កំពុងប្រកាសពីភាពអាសន្ននៃអំពើភេរវកម្ម កើតឡើងដោយសារការមិនមានភាពសុខុដុមផ្នែកសាសនា៕
