នាវាចម្បាំងរបស់សហរដ្ឋអាមេរិកបានចល័តទៅជិតកោះកំពុងមានជម្លោះ ហើយចិនកំពុងកាន់កាប់នៅសមុទ្រចិនខាងត្បូង កាលពីថ្ងៃអង្គារម្សិលមិញ។
ទីភ្នាក់ងារព័ត៌មាន AFP បានចុះផ្សាយថា នាវាចម្បាំងរបស់អាមេរិកបាន ធ្វើទំណើរទៅជិតកោះប៉ារ៉ាសែលនិង ថ្មប៉ប្រះទឹក នៅក្បែរៗនោះ ដែលចិនកំពុងកាន់កាប់ និងមានជម្លោះជាមួយប្រទេសជិតខាងនោះ។
ទោះយ៉ាងណាមិនទាន់មានប្រតិកម្មជាផ្លូវការពីរដ្ឋអំណាចទីក្រុងប៉េកាំងនោះទេ។ បច្ចុប្បន្នរដ្ឋការរបស់លោក ត្រាំ កំពុងតែស្វែងរកជួយពីចិនក្នុងការដាក់សម្ពាធលើកម្មវិធីអាវុធនុយក្លេអ៊ែរបស់កូរ៉េខាងជើង។
នៅខែវិច្ឆិកាខែក្រោយនេះ មេដឹកនាំសហរដ្ឋអាមេរិក លោក ដូណល ត្រាំ នឹងធ្វើដំណើរទស្សនកិច្ចនៅតំបន់អាស៊ី ហើយពេលនោះលោកក៏ទៅកាន់ប្រទេសចិនដែរ។ លោក ត្រាំ ក្រោយពេលដែលលោកកាន់តំណែងកាលពីខែមករា ឆ្នាំ២០១៧ កើតមានបញ្ហាមួយចំនួនជាមួយចិន លើការទំនាក់ទំនងទាំងផ្នែកសេដ្ឋកិច្ច និងគោលនយោបាយអន្តរជាតិ៕