អាជ្ញាធរថៃនឹងចាប់ផ្តើមផាកពិន័យចាប់ពីខែវិច្ឆិកាខាងមុខនេះ ចំពោះអ្នកជក់បារីនៅតំបន់ឆ្នេរសមុទ្រល្បីឈ្មោះ ដែលមានអ្នកទេសចរច្រើនទៅកំសាន្ត ដែលអាចត្រូវឲ្យបង់ប្រាក់៣០០០ដុល្លារ ឬ ត្រូវជាប់ពន្ធនាគាររយៈពេលមួយឆ្នាំ។
ក្រសួងគ្រប់គ្រងរ៉ែនិងតំបន់ឆ្នេរ បានដាក់ចេញវិធានការនេះឡើងបន្ទាប់ការត្រួតពិនិត្យលើដីនៅឆ្នេរចំនួន៩ម៉ែត្រការេនៃឆ្នេរ Patong នៅក្នុងកោះ Phuket រកឃើញកាកសំណល់ពីបារីប្រមាណ០,៧៦% នៅក្នុងផ្ទៃក្រឡាមួយម៉ែត្រការេ។ នេះបើតាមសារព័ត៌មានបាងកកប៉ុស្តិ៍របស់ថៃ។
មន្ត្រីរបស់ថៃរកឃើញទៀតថា លើផ្ទៃឆ្នេរចំនួន២,៥គីឡូម៉ែត្រ មានកន្ទុយបារី១០១ ០៥៨ដែលបង្កឲ្យប៉ះពាល់ដល់បរិស្ថាន។
អាជ្ញាធរថៃប្រកាសថា នឹងបំបាត់ផ្សែងបារីនៅតាមតំបន់ឆ្នេរសំខាន់ដែលបានកំណត់ទាំង២០គឺចាប់ពីខែវិច្ឆិកា។ ឆ្នេរដែលបានកំណត់នោះរួមមានទាំងឆ្នេរ Koh Samui, Pattay, Hua Hin និង Patong ជាដើម។ អាជ្ញាធរបញ្ជាក់ថា ទៅថ្ងៃអនាគតនឹងបំបាត់ការជក់បារីនៅតាមឆ្នេរទាំងអស់ទូទាំងប្រទេស៕