រដ្ឋាភិបាលកម្ពុជាថានឹងបន្តសហការរុករកអដ្ឋិធាតុទាហានអាមេរិកវិញ បើមានការចរចាណាមួយអាចទុកចិត្តបានក្នុងការធានាទៅវិញទៅមកក្នុងការលើកលែងការផ្អាកកិច្ចសហប្រតិបត្តិការនេះ។
លោក ហ៊ុន សែន លើកឡើងបែបនេះក្នុងលិខិតមួយចុះថ្ងៃទី១២ ខែតុលា ឆ្លើយតបទៅនឹងការព្រួយបារម្ភរបស់លោកស្រី អាន មៀលហ្រ្គីហ្វីត ប្រធានក្រុមប្រឹក្សាភិបាល និងជានាយកប្រតិតបត្តិសម្ព័ន្ធគ្រួសាររបស់ឈ្លើយសឹក និងទាហានអាមេរិកបាត់ខ្លួននៅអាស៊ីអាគ្នេយ៍។
ក្នុងលិខិតឆ្លើយតបលោក ហ៊ុន សែន លើកឡើងថាការសម្រេចផ្អាកកិច្ចសហប្រតិបត្តិការរុករកអដ្ឋិធាតុទាហានអាមេរិកនេះ គឺមានលក្ខណៈបណ្ដោះអាសន្នប៉ុណ្ណោះ ហើយរដ្ឋាភិបាលកម្ពុជានឹងចាប់ផ្ដើមឡើងវិញ នៅពេល ដែលទទួលបានការធានាទៅវិញទៅមក និងអាចទុកចិត្តបានស្ដីពីការលើកលែងការផ្អាកនេះ ដើម្បីជាគុណ ប្រយោជន៍ ដល់ប្រជាជននៃប្រទេសទាំង២។
លោក ហ៊ុន សែន លើកឡើងថាកម្ពុជាមានគោលការណ៍ចំពោះកិច្ចសហប្រតិបត្តិការក្នុងកម្មវិធីមាតុភូមិនិវត្តន៍ ប៉ុន្តែកម្ពុជាបែរជាត្រូវទទួលរងការដាក់ទណ្ឌកម្មដោយអយុត្តិធម៌ នៅពេលដែលកម្ពុជាគ្រាន់តែទាមទារឲ្យអាមេរិកពិចារណាបន្ថែមលើទិដ្ឋភាពមនុស្សធម៌ និងមេត្តាធម៌។
កាលពីថ្ងៃទី២៥ ខែកញ្ញា លោកស្រី អាន មៀល ហ្រ្គីហ្វីតផ្ញើលិខិតមួយទៅកាន់លោក ហ៊ុន សែន ដោយលើកឡើងថាកន្លងមករដ្ឋាភិបាលលោក ហ៊ុន សែន បានទទួលនូវសំណុំឯកសាររបស់អ្នកបាត់ខ្លួន ហើយបានឯកភាព ថារួមសហប្រតិបត្តិការរុករក ព្រោះនេះគឺជាបញ្ហាមនុស្សធម៌ និងមិនជាប់ពាក់ព័ន្ធនឹងការខ្វែងគំនិតគ្នាផ្នែកនយោបាយនោះទេ។
កាលពីថ្មីៗកន្លងទៅរដ្ឋាភិបាលលោក ហ៊ុន សែន សម្រេចផ្អាកកិច្ចសហប្រតិបត្តិការក្នុងស្រាវជ្រាវ និងរុករកអដ្ឋិធាតុទាហានអាមេរិកដែលបានស្លាប់នៅកម្ពុជានេះ ជាការឆ្លើយតបជាថ្នូរនឹងរដ្ឋាភិបាលអាមេរិក ដែលបានដាក់ទណ្ឌកម្មមិនផ្ដល់ទិដ្ឋាការធ្វើដំណើរ ដល់មន្ត្រីការទូតក្រសួងការបរទេសកម្ពុជា និងក្រុមគ្រួសាររបស់ពួកគេ។
ក្រសួងការបរទេសអាមេរិក បានសម្រេចដាក់ទណ្ឌកម្មមិនផ្ដល់ទិដ្ឋាការនេះ ដោយសារកម្ពុជា បដិសេធមិនព្រមទទួលយកការបញ្ជូនជនជាតិខ្មែរ ដែលប្រព្រឹត្តបទល្មើស ហើយត្រូវបញ្ជូនពីសហរដ្ឋអាមេរិកមកកាន់កម្ពុជា៕