សណ្ឋាគារនៅបាងកកជាច្រើនមានអ្នកកក់ទុកមុនសម្រាប់ថ្ងៃបូជាសពអតីតស្តេចថៃ

សមាគមសណ្ឋាគារនៅក្នុងទីក្រុងបាងកកបានឲ្យដឹងថា សណ្ឋាគារជាច្រើនត្រូវបានភ្ញៀវកក់ទុកមុនសម្រាប់ពួកគេស្នាក់នៅ ក្នុងពេលបុណ្យបូជាសាកសពអតីតស្តេចថៃ ភូមិ វិបុល ដែលនឹងប្រព្រឹត្តទៅនៅថ្ងៃទី២៦ខែតុលាខាងមុខនេះ។​

អតីតក្សត្រថៃភូមិ វិបុល ចូលទិវង្គតនៅថ្ងៃទី១៣ ខែតុលា ឆ្នាំ២០១៦ បន្ទាប់ពីព្រះអង្គគ្រងរាជសម្បត្តិរយៈពេល​៧០ឆ្នាំ។ ទីតាំងដែលមានការមមាញឹកខ្លាំងនៅ Grand Palace និង Sanam Luang។ នេះបើតាមទីភ្នាក់ងារព័ត៌មានរ៉យទ័រ។​​

ក្នុងពិធីបុណ្យបូជាសពអតីតព្រះមហាក្សត្រថៃ ដែលប្រព្រឹត្តទៅនៅសប្តាហ៍ក្រោយនេះ គេរំពឹងថា នឹងមានអ្នកចូលរួមកាន់ទុក្ខចំនួន​២៥០ ០០០នាក់។​

សមាគមសណ្ឋាគារនៅបាងកកឲ្យដឹងថា អ្នកដែលកក់សណ្ឋាគារទាំងនេះគឺ៨០%ជាជនជាតិថៃ និង ២០%ជាជនបរទេស។ ចាប់តាំងពីថ្ងៃចន្ទដើមសប្តាហ៍នេះ សណ្ឋាគារមួយចំនួនធំនៅជិតកន្លែងបូជាព្រះសពនេះ មានអ្នកកក់ទុកពេញអស់​ហើយ៕