ប្រធានាធិបតីហ្វីលីពីនលោក រ៉ូឌ្រីហ្គោ ឌូទើតេ ថ្លែងបញ្ជាក់កាលពីថ្ងៃព្រហស្បតិ៍ម្សិលមិញថា ជនជាតិម៉ាឡេស៊ីជាមេដឹកនាំសំខាន់ម្នាក់នៃក្រុមISនៅក្នុងតំបន់អាស៊ីអាគ្នេយ៍ ត្រូវយោធានៅភាគខាងត្បូងរបស់ហ្វីលីពីនបានសម្លាប់ហើយ។
លោកឌូទើតេថ្លែងនៅក្នុងទីក្រុងម៉ានីលកាលពីម្សិលមិញថា បុរសម្នាក់នោះបានស្លាប់នៅក្នុងចំណោមមនុស្ស៣នាក់ផ្សេងទៀតដែលក្រុមយោធាហ្វីលីពីនបានសម្លាប់។ នេះបើតាមសារព័ត៌មាន Channel News Asia។
ចំណែកប្រភពពីយោធាហ្វីលីពីនបញ្ជាក់ថា Mahmud Ahmad ជនជាតិម៉ាឡេស៊ីជា បុគ្គលម្នាក់ក្នុងចំណោម២០នាក់ផ្សេងនៃក្រុមIS ដែលត្រូវក្រុមយោធានសម្លាប់នៅពេលថ្មីៗនេះនៅក្នុងទីម៉ារ៉ាវី។
Mahmud អាយ៣៩ឆ្នាំ ជាអតីតសាស្ត្រាចារ្យបង្រៀននៅតាមសាកលវិទ្យាល័យ ហើយជាអ្នកដែលគេដឹងថាបានធ្វើសកម្មភាពប្រមូលថវិកាដើម្បីយកទៅផ្គត់ផ្គង់ការធ្វើសកម្មភាពរបស់ពួកក្រុមធ្វើភេរវកម្មIS។
ទីក្រុងម៉ារ៉ាវីបច្ចុប្បន្នកំពុងតែស្ថិតនៅក្នុងការហ៊ុំព័ទពីពួកក្រុមភេរវកម្ម បន្ទាប់ពីមានការផ្ទុះអាវុធ១៥០ថ្ងៃកន្លងមកហើយ និង មានមនុស្សជាង១០០០នាក់បានស្លាប់គឺភាគច្រើនជាក្រុមបះបោរ។