ប្រជាពលរដ្ឋវៀតណាមរស់នៅក្នុងខេត្តចំនួន៤នៅភាគកណ្តាលទទួលបានសំណងពីរដ្ឋាភិបាលទឹកប្រាក់ជាង២៧៥លានដុល្លារពាក់ព័ន្ធករណីសារធាតុពុលបានសម្លាប់ត្រីអស់៧០តោន កាលពីខែមេសាឆ្នាំ២០១៦ ហើយបានធ្វើឲ្យបះពាល់ដល់ការរស់នៅរបស់ប្រជាពលរដ្ឋចំនួន២៦០ ០០០នាក់។
សារធាតុពុលដែលបានសម្លាប់សត្វត្រីនេះ មន្ត្រីជំនាញរកឃើញថា ហូរចេញពីរោងចក្រផលិតដែកមួយកន្លែងជាកម្មសិទ្ធិរបស់តៃវ៉ាន់ឈ្មោះក្រុមហ៊ុន Forosa។ នេះបើតាមសារព័ត៌មាន Vietnam News។
សេចក្តីប្រកាសនេះ បានលើកឡើងក្នុងសន្និសីទសារព័ត៌មានមួយកាលពីថ្ងៃពុធនៅក្នុងការិយាល័យរដ្ឋាភិបាលក្នុងទីក្រុងហាណូយ មន្ត្រីជាន់ខ្ពស់រដ្ឋាភិបាលវៀតណាមបានថ្លែងថា រដ្ឋសម្រេចផ្តល់សំណងដល់ប្រជាពលរដ្ឋរស់នៅក្នុងខេត្តចំនួន៤ ដែលរងផលប៉ះពាល់ដោយសារតែសារធាតុពុលទាំងនេះ។
ក្នុងចំណោមពលរដ្ឋជាង ២សែនដែលត្រូវទទួលបានសំណងនេះ គឺពលរដ្ឋនៅក្នុងខេត្តចំនួន៣ស្មើនឹង ៩៤% ពួកគេទទួលបានសំណងរួចរាល់ហើយ។
រដ្ឋាភិបាលបានអនុម័តក្នុងការដាក់ខេត្តទាំង៤ឲ្យស្ថិតនៅក្នុងស្ថានភាពប្រឈមនៃការប៉ះពាល់ដោយសារបញ្ហាបរិស្ថាន ហើយដាក់គម្រោងបរិស្ថាននិងធនធានធម្មជាតិនៃក្រសួងបរិស្ថានដោះស្រាយបញ្ហាទាំងនេះ។