មនុស្ស ១១នាក់ ដែលភាគច្រើនជាកម្មករបរទេស ត្រូវបានសម្លាប់នៅក្នុងគ្រោះថ្នាក់រអិលបាក់ឌីនៅឯការដ្ឋានសាងសង់មួយកន្លែង ស្ថិតនៅលើកោះប៉េណាំង ប្រទេសម៉ាឡេស៊ី កាលពីថ្ងៃម្សិលមិញនេះ ខណៈដែលអ្នកស្រុកផ្ទុះកំហឹងកាន់តែខ្លាំងចំពោះគ្រោះថ្នាក់នេះ។ នេះដោយយោងតាមសេចក្ដីរាយការណ៍របស់ទីភ្នាក់ងារព័ត៌មាន AFP ដោយបានដកស្រង់សម្ដីមន្ត្រីម៉ាឡេស៊ី។
AFP បានរាយការណ៍បន្តថា ផ្ទាំងដីដ៏ធំបានរអិលធ្លាក់ពីជញ្ជាំងភ្នំកាលពីព្រឹកថ្ងៃសៅរ៍ និងបានធ្លាក់កប់លើមនុស្ស ខណៈដែលពួកគេកំពុងធ្វើការនៅលើអគារលំនៅឋានមួយនៅលើកោះនោះ ដែលសម្បូរទៅដោយភ្ញៀវទេសចរ។
ក្រុមអាជ្ញាធរម៉ាឡេស៊ី ដំបូងឡើយ បាននិយាយថា កម្មករបរទេស ១៣នាក់ និងមេការសំណង់ជនជាតិម៉ាឡេស៊ីម្នាក់ បានកប់នៅក្រោមដីភក់ នៅឯការដ្ឋានសំណង់នោះ។
ប៉ុន្តែ មន្ត្រីសង្គ្រោះ ត្រូវបានសារព័ត៌មានម៉ាឡេស៊ីដកស្រង់សម្ដីចុះផ្សាយថា ចំនួនមនុស្សកប់នៅក្រោមដី មាន ១១នាក់ ខណៈដែលកម្មករ ៣នាក់ទៀត បានរត់គេចផុតពីគ្រោះថ្នាក់នោះ។
កម្មករ ៣នាក់ដែលគេចផុតពីដីបាក់កប់លើនោះ ត្រូវបានបញ្ជូនទៅព្យាបាលនៅមន្ទីរពេទ្យ។
អាជ្ញាធរម៉ាឡេស៊ីបានឲ្យដឹងថា សពកម្មករ ៧នាក់ ត្រូវបានគេរកឃើញនៅល្ងាចថ្ងៃអាទិត្យកន្លងមកនេះ ក្នុងនោះមានកម្មករបង់ក្លាដែស ២នាក់ ឥណ្ឌូនេស៊ី ២នាក់ កម្មករ ២នាក់មកពីភូមា និងម្នាក់ទៀត មិនត្រូវបានគេស្គាល់អត្តសញ្ញាណទេ។
កម្មករចំណាកស្រុកជាច្រើន ត្រូវបានជួលឲ្យធ្វើការនៅក្នុងឧស្សាហកម្មនានាដែលប្រើប្រាស់កម្លាំងសុទ្ធ និងទទួលបានកម្រៃទាប ដូចជា វិស័យសំណង់នៅក្នុងប្រទេសម៉ាឡេស៊ី៕