ទីភ្នាក់ងារព័ត៌មាន Reuters បានចុះផ្សាយថា បក្សកាន់អំណាចរបស់លោកនាយករដ្ឋមន្ត្រីជប៉ុន ហ្ស៊ិនហ្ស៊ូ អាបេ បានទទួលជ័យជម្នះយ៉ាងធំនៅក្នុងការបោះឆ្នោតមុនអាណត្តិកាលពីថ្ងៃអាទិត្យម្សិលមិញនេះ ដែលនឹងផ្ដល់ឱកាសឲ្យលោកក្លាយទៅជានាយករដ្ឋមន្ត្រីកាន់តំណែងយូរជាងគេនៅក្នុងប្រវត្តិសាស្ត្រជប៉ុន និងជំរុញដល់ជំហររបស់លោកក្នុងការកែប្រែរដ្ឋធម្មនុញ្ញសន្តិភាពនិយមរបស់ប្រទេសនេះ។
ដោយបានតាមដានលទ្ធផលនៃការបោះឆ្នោតដែលប្រកាសដោយប្រព័ន្ធផ្សព្វផ្សាយក្នុងស្រុកនោះ Reuters បានរាយការណ៍ថា ក្រុមសម្ព័ន្ធដែលដឹកនាំដោយគណបក្សប្រជាធិបតេយ្យសេរីរបស់លោក អាបេ ទទួលបានអាសនៈសរុប ៣២១ ដែលធ្វើឲ្យក្រុមនេះឈ្នះបានអាសនៈ ២ភាគ ៣ ជាសំឡេងភាគច្រើនដាច់ខាត នៅក្នុងចំណោមអាសនៈសរុប ៤៦៥ នៅក្នុងរដ្ឋសភា។
ជ័យជម្នះដ៏ធំនេះ បានធានាថា លោក អាបេ ដែលបានចូលកាន់តំណែងកាលពីខែធ្នូឆ្នាំ២០១២នោះ នឹងបន្តដឹកនាំប្រទេសអាណត្តិទី៣មានរយៈពេល ៣ឆ្នាំ ក្នុងនាមជាមេដឹកនាំបក្សប្រជាធិបតេយ្យសេរី នៅខែកញ្ញាឆ្នាំក្រោយ និងក្លាយជានាយករដ្ឋមន្ត្រីជប៉ុនកាន់តំណែងយូរជាងគេ។ ជ័យជម្នះនេះ ក៏មានន័យផងដែរថា យុទ្ធសាស្ត្រកំណើនសេដ្ឋកិច្ចរបស់លោក អាបេ ដែលផ្ដោតលើគោលនយោបាយបន្ធូរបន្ថយរូបិយវត្ថុនោះ នឹងនៅតែបន្តទៅមុខទៀត។
លទ្ធផលផ្លូវការនៃការបោះឆ្នោតដែលត្រូវបានរៀបចំធ្វើឡើងចំពេលដែលប្រទេសជប៉ុនរងព្យុះទីហ្វុងកាលពីថ្ងៃម្សិលមិញនោះ ត្រូវបានគេរំពឹងថា នឹងប្រកាសជាសាធារណៈនៅថ្ងៃចន្ទនេះ។
ជ័យជម្នះរបស់លោក អាបេ នៅក្នុងការបោះឆ្នោតនេះ នឹងជួយពង្រឹងគោលជំហររបស់លោក ដែលប៉ុនប៉ងកែប្រែរដ្ឋធម្មនុញ្ញត្រង់មាត្រា ៩ ដែលបានកំណត់ឲ្យកងទ័ពជប៉ុនមានតួនាទីត្រឹមការពារខ្លួនតែប៉ុណ្ណោះ។ តែនោះគឺជារដ្ឋធម្មនុញ្ញត្រូវបានសរសេរឡើងដោយអាមេរិក នៅក្រោយការបញ្ចប់ទៅនៃសង្គ្រាមលោកលើកទី២៕
